Shillong, Lber 26: Project Manager, Anusha Project Pvt. Ltd., Western Bypass la phah ka jingujor ba ha ka 20 tarik mynta u bnai, ki runar bym lah ban ithuh ki la tuh haduh 15 tylli ki base plate bad kiwei ki tiar na ka jaka ba la shna ïa ka surok kaba ha Sumer (RB).
Ha kawei pat ka jingjia Labour Inspector, East Garo Hills District la phah ka jingujor ba ha ka 6 tarik mynta u bnai ha ka por 2.50 nohphai sngi, ha ka jingleit jurip ïa ka ïew Williamnagar (EGH), ka District Task Force ka la lap ba la pyntrei ïa u khynnah ba ka dang 16 snem ka rta da uwei u briew uba kyrteng u Mustafa Ali uba na Mankachar, Assam.
Shuh shuh ha kawei pat ka jingjia ki pulit ki la ïathuh ba ka Moni Rekha Hajong ka la phah ka jingujor ba ha ka mied jong ka 18 tarik mynta u bnai, ki runar bym lah ban ithuh ki la tuh ïa kumba 9 tylli ki solar panel kiba la shongdor kumba T. 1.08 lak napoh ka shnong Tombollagre (WGH).
