Shillong, Lber 26 : Ka Khasi Hills Autonomous District Council (KHADC) kam pat lah satia ban ai ïa ka rai la kan bteng neem ban pynlong biang ïa ka tamasa Monolith Festival mynta u snem.
Ïa kane la jubab da u Chief Executive Member ka KHADC, Bah Shemborlang Rynjah halor ka jingkylli ba wanrah da ka MDC ka Nongshken Kong Grace Kharpuri ha ka sngi sdang jong ka Dorbar Mangtyngka jong ka Council ha kane ka sngi Balang.
“Mynta ngin dang bishar bniah ïa kane ka kam. Ngim pat lah ban shim ïa ka rai hynrei ngin peit ïa kaba kloi tam bad ngin sa ai ka jubab,” la ong u CEM haba jubab ha Ïing Dorbar.
Lah ban kdew ruh ba kane kadei ka Dorbar Mangtyngka kaba nyngkong eh na ka bynta ka Executive Committee kaba thymmai ba ïalam hi marwei da ka Voice of the People Party (VPP).
