Pynkyndit ki paid nongkyrshan ka NPP ka Sohra Constituency ha ka sngi leit thep kyrteng u Bah Alan

Sohra, Rymphang 6 : Ki paid nongkyrshan ka NPP ha ka Sohra Constituency ki la pynkyndit bynriew ïa ki paid nongshong shnong jong ka thaiñ Sohra namar kumba saw hajar ngut tam ki paidbah ki la ïamih ban synran bad kyrshan ïa u kyrtong jong ka NPP na Sohra Constituency u bah Alan West Kharkongor haka por ba u la leit ban thep kyrteng naka bynta kane ka election ban wan ha Sohra Civil Sub Division.
Ka jingleit thep kyrteng jong u bah Alan West Kharkongor kaba la long ha ka por 12.00 baje noh phai sngi, ha kaba la ïohi ba ka jingtuid jong kito ki nongkyrshan kiba la wan na kylleng ka contituetncy.
Kat kum ka jingtip la ïathuh ba kham bun na kine ki nongkyrshan kiba tuid sha katei ka jaka mynta ka sngi kidei na ki thaiñ Laitlyngkot, Nongkynrih, ki thain Khatarshnong, Mawjrong arsut ter ter haduh Laitryngew. Na ka daw ba kadei ka sngi iewbah Sohra kham bun naki nongshong shnong jong ka thaiñ sohra ki khlem la ïohlad than ban wan ïashim bynta ha katei ka jingleit thep kyrteng mynta ka sngi. Haba u nongthoh khubor u la ïoh ban ïakren bad u bah Alan West Kharkongor u la pynpaw ïaka jingkyndit kaba khraw halor katei ka jingwan tuid jong kitei ki nongkyrshan bad u la ong haka jingshisha naka liang jong u, u la khmih lynti ba tang katto katne ngut ki dkhot jong ka NPP Sohra kin wan ban synran ïa u. U la pynpaw ïa ka jingsngewnguh kaba khraw ïa kito ki nongkyrshan kiba la wan sbun mynsiem dala ka
mon lajong bad ki la pynpaw ba kim lah ban ieh noh ïa u ne u kyrtong jongki ha kum kane ka khyllip mat.
Hadien ba la dep noh ka jingthep kyrteng kitei ki paidbah ki la ïa tuid sha madan Maraikaphon kaba dei ka shnong trai jong une u kyrtong ban pynshngaiñ ïa u bad ban ai ka jingkhublei kitbok kit rwiang khamtam ba ka sngi jong ka jingthep vote ka la jan. Kumba ka paw la ithuh shai ba ka seng NPP watla ka dang shu mih dang ha ki katto katne bnai ha Sohra constituency la lap ba kane ka seng ka la khie rasong bad nang ïai kiew katba nang mih ki sngi.