Pynkut noh ka MACS ïa ka IHC ha Ri-Bhoi, poi 12282 ngut kiba shah khmih bñiah ha ki 181 tylli ki Camps

Nongpoh, K’Lyngkot 09: Ka Meghalaya Aids Control Society (MACS) haka jingïatreilang bad ka ophis u Deputy Commissioner bad kiwei kiwei ki tnad sorkar mynta ka sngi kala pynkut noh ïaka Integrated Health Campaign ban ai jingsumar ei sha ki paidbah ha kylleng ki shnong bad ki jaka jong ka dong Ri-Bhoi ïa kaba la sdang naduh ka 17 tarik Risaw 2023.
Ïa katei ka Integrated Health Campaign la wan ban pynhap pyrda noh mynta ka sngi da u Bah Mayral Born Syiem Chairman ka Meghalaya State Health Advisory Board jong ka sorkar jylla kum u kongsan haka jingdonlang ka Dr. B Decruse Project Director ka MACS, Dr. L Myrthong Deputy Director (Medical) MACS, Dr. D Blah Addl. DM&HO ka Ri-Bhoi District, Dr. E Kalwing District AIDS Control Officer (DACO) Ri-Bhoi District bad kiwei kiwei ki ophisar naki tnad sorkar bapher bapher bad ka tnad ka koit ka khiah.
Ka jingjied jong ka MACS ïaka Ri-Bhoi District kaba dei ruh ka Aspirational District ban pynlong kum katei ka jait prokram ha kaba ïadei bad ka koit ka khiah khamtam ban khmih bñiah ïaki briew kiba don ka jingpang HIV/AIDS kala wanrah shibun ka jingmyntoi ha kaba ïadei bad ka koit ka khiah nmaka bynta ki paidbah nongshong shnong ha kylleng ki jaka jong ka dong Ri-Bhoi ba ki lah ruh ban leit Check-up ïalade ïaki jait jingpang bapher bapher naduh ka HIV, ki bñiat, TB, kiba duna haki dkhot met bad kiwei kiwei khlem da donkam ban siew pisa.
Ka Dr. EA Hujon Assistant Director (Prevention) ka MACS haba kren ha katei ka sngi kala pynpaw ba ïa katei ka Integrated Health Campaign la sdang naduh ka 17 tarik Risaw 2023 haki 181 tylli ki camps, bad ha katei ka jingpeit bad khmih ïaki jingpang bapher bapher kumba 12282 ngut ki nongshong shnong kila wan ban shim bynta ban check up ïalade halor ki jait jingpang bapher bapher bad kaba la pynkut noh mynta ka sngi bad ka thong jong katei ka Health Camp bala pynlong ryngkat ka jingtreilang bad ki tnad sorkar bapher bapher ka long ban ai jingtip sha ki paidbah halor ki jait jingsumar bapher bapher ba ka tnad ka koit ka khiah ka lah ban ai ka jingshakri sha ki paidbah naduh ka HIV, AIDS, TB, ka jingktah jong u duma bad kiwei kiwei ki jait jingpang namar ha katei ka jaka ki don ki doctor bad ki nurse kiba ban peit ban khmih ïaki nongpang.
Na ka liang u Bah Mayral Born Syiem kum u kongsan haba kren ha katei ka sngi u la ai ka jingkhublei ba kyrpang ïaka MACS kaba la jied ïaka Ri-Bhoi District ban pynlong kum katei ka Health Campaign khamtam ka Ri-Bhoi kadei ka khyrdop ba bun naki paidbah ki rung ki mih sha ka jylla kaba lah ruh ban wanrah shibun ki jait jingpang khamtam u ñiangkulia ba dei uwei naki jait jingpang ba ma bad ba la sdang ban saphriang ha kylleng ki jaka khamtam ha Ri-Bhoi.
U la ong ruh ba ka dei ka por ba ki paidbah naduh ki nongïalam Balang, shnong, ki kynhun sengbhalang ban mih shakhmat ban ai ka jingïatreilang naka bynta ban rat diengkhong ïaka jingpang HIV ha kaba u la kyrpad ruh ïaki paidbah kiba suba ki don ïa katei ka jingpang ba kim dei ban tieng lane lehraiñ hynrei ba kin mih shakhmat ban leit phah test bad phah sumar ïalade haki jaka sumar ba hajan tam.
U Bah Mayral u la ai jingïaroh ruh ïaka sorkar kaba la shimkhia ban kyntiew haki liang bapher bapher khamtam ba ka Ri-Bhoi District ka dei kawei naki district kaba la shah jied kum ka Aspirational District.
Ha katei ka sngi naka liang ka MACS kala ioh ruh ban pynkup burom ïaki tnad sorkar bapher bapher, ki doctor ka tnad ka koit ka khiah, ki kynhun trei mon sngewbha kiba la don bynta naduh basdang katei ka Health Campaign ba kala long kaba seisoh.