Ym don kynhun barit bakhraw bad ym don niam kyrpang ha ka Congress : Dr Chellakumar

Nongstoiñ, K’lyngkot 09: Haba kren ha ka jingïakynduh bad ki nongtrei ka Congress Party ha Nongstoiñ Congress Bhavan, u AICC General Secretary Incharge Meghalaya Dr Chellakumar, MP na ka Jylla Tamilnadu, u la ong ba dei tang ka party Congress ka party ka bym ju don barit ba khraw, hynrei baroh ki long kumjuh ha baroh kawei ka ri India.
U la ong ba dei ruh tang ka Congress ka party kaba la 138 snem kaba ai jinghun sha baroh ki nongshong shnong hapoh ka ri, namar kam ju don niam kyrpang ïano ïano bad baroh ki lah ban mane laitluid ha la ka jingngeit.
“Ka Congress ka dei ka party jong baroh naduh Kashmir haduh Kanyakumari, ym don ba lieh ne baiong bad ym don niam, ym don jaidbynriew, hynrei ka dei ka party na ka bynta jong baroh ki nongshong shnong hapoh ka ri”, u la ong.
Ha kajuh ka por u la ong ba ki nongkitkam jong ka party kim dei ban tieng ne artatien, namar kumba long mynta hi ki dak ki shin kylleng ki jaka hapoh ka ri India, ki pynpaw shai ba ka Congress kan sa wan biang ha ka bor. U la kyntu sha baroh ki nongkitkam bad ki nongkyrshan ka Congress ba kin long kiba ïaineh bad trei shitom, khnang ba ka jingjop bad ka burom kan wanphai biang sa shisien.
Na ka liang u Ma Vincent Pala u la pynpaw ïa ki kyntien ba ki dkhot ka District Congress Committee bad jong ka Nongstoiñ Block Congress Committee, kim dei ban kheiñ sting satia watla hadien ka jingjop ha ka elekshon MLA ba la dep. Namar, ka jingïakhun na ka bynta ka MP ka long kaba kongsan.
U la ong ruh ba donkam ban hiar biang sha ki Unit bad ki polling Station ban pynkhlaiñ bad na ka liang jong u, un sa nang hiar sha Nongstoiñ bad West Khasi Hills na ka por sha ka por ban ïatei ïa syllok kumno ban pynïaid shakhmat ïa ki kam jong party.
U Ma Pala u la kubur ruh ba ka don ka jingtlot ha ki katto katne ki jaka bad ki Constituency namar ka jingphet seng jong ki katto katne ki nongïalam. Hynrei kumba long hi ïa mynta ha Nongstoiñ kam long kumta bad man ki jaka hi ka tynrai jong ka Congress ka khlaiñ bha.
U la ong ruh ba ki kam pynroi baroh hi kiba la leh ha ka ri dei ka Congress party. U la kdew ruh katto katne ki kam pynroi khamtam ki surok bah National Highway kiba ki paidbah ka West Khasi Hills ki sakhi bad ki jingtrei ruh ki dang treikam shait shait shakhmat.
U la pyntip ruh ba na ka liang u Rahul Gandhi un sa wan sha Guwahati ha kine ki khyndiat por ban wan ban ïakren ïa ki manifesto jong ka party. Kumta u la ong ka long kaba kongsan lada na ka liang ka District Congress Committee kan pynkhreh ïa ki mat kiba biang eh kiba ïa dei bad ka District bad ki paidbah nongshong shnong hapoh jong ka.
Na ka liang jong u, u la ai mynsiem bad kitbok sha baroh ki nongtrei jong ka party ba kin ïa long shi tylli bad ban trei shitom da ka mynsiem kumba ki la leh ha kine ki snem ba la leit noh kata ha ka elekshon MDC bad ha kane ka elelshon MLA 2023 ba dang shu dep.
Ïa u Ma Pala bad Dr Chellakumar, la pdiang burom da u Bah Gabriel Wahlang MLA ka Nongstoiñ, ha ryngkat ka jingdonlang jong u Bah Bormanding Nonglang President DCC, Bah N.Nongdkhar ex MDC, Bah Fourteenson Lyngkhoi, lem bad kiwei kiwei de ki riew rangbah bad ki nongkitkam ba shitrhem jong ka party Congress ka West Khasi Hills.