Nongstoiñ, K’lyngkot 9: Ka Auxilium Roilang Institute for Sustainable Empowerment Pyndengrei Nongstoiñ, mynta ka sngi ka la ïoh ban sam ïa ki kor suhjaiñ sha ki khynnah kiba la dep ïa ka jingshah hikai ha katei ka shlem, kiba la don haduh 26 ngut bad ha kajuh ka por kitei ki khynnah ki la ïoh ruh ïa ki Syrnod lyngba ka jingithuh jong ka Radiant Infonet New Delhi.
Ïa katei ka jinghikai ha katei ka shlem la bei tyngka da ka Meghalaya State Skills Development Society under Labour Department (MSSDS) hapoh ka jingkhmih ka Skills Meghalaya bad mynta ka sngi haduh 24 ki khynnah thymmai ki la don bad sdang ïa ki jinghikai.
Ha kane ka jingïalang ïa kaba la pynlong ha phyllaw jong ka ARSTC Nongstoiñ Pyndengrei, u bah Ewanmi Lyngdoh MCS u la long kum u kongsan bad ka kong Memorial Khongkai Skills Development Officer West Khasi Hills District kum ka symbud kongsan, ha ryngkat ka jingïadonlang ki sister, ki brother bad u bah Michael Marweiñ sordar shnong Pyndengrei bad kiwei kiwei.
Haba ai jingkren ka kong Memorial Khongkai Skills Development Officer West Khasi Hills District ka la ong, “Wat buh pynsarang ïa ki sap kiba la ïoh na katei ka shlem jinghikai, hynrei hap ban nang ban ïeng ha la ki kjat ban pyntyllun shakhmat, na ka bynta ka kamai jakpoh. Namar kane ka sngi ka dei ka jingsdang ym kaba kut wat haba la dep pass ïa ka jingshah hikai”.
