Shillong, K’lyngkot, 09: Lai ngut ki samla pule proh jabieng jong ka IIM, Shillong ba kynthup ïa ka Kashish Sharma, ka Saagarika Bhasker bad ka Sampada Dubey ki la ïoh pdiang ïa ka baibam kaba la tip kum ka Aditya Birla Scholarship
Ka IIM Shillong ka ju pynmih ïa ki samla pule kiba stad kiba ju ïai bteng ban ïoh ïa ka Aditya Birla Scholarship, ka baibam kaba pawnam ha ka ri.
Ka jingsdang ban ïoh ïa kane ka baibam, ka la sdang ha u snem 2011 haba uwei na ki samla pule jong ka IIM Shillong u la ïoh ïa ka Scholarship ha ka sien kaba nyngkong eh bad kane ka la long ka jingsdang ban ïoh ïa ka baibam. Nangne shakhmat, sa 15 ngut ki samla pule jong ka IIM Shillong ki la shah jied ban ïoh pdiang ïa kane ka baibam, halor ka jingtrei shitom jong ki ha ka jingpule.
Ka IIM Shillong ka ai khublei ïa ki nongïoh baibam jong u snem 2024 ba kynthup ïa ka Kashish Sharma, ka Saagarika Bhasker Panyam, bad ïa ka Sampada Dubey kiba dang pule ïa ka PGP-2023-25, IIM Shillong na ka bynta ka jingïoh pdiang ïa ka baibam.
Ha kajuh ka por, ka samla Aastha Ratti ka la ïoh pdiang ïa ka OP Jindal Scholarship ka dei kaba dang pule ïa ka PGP-2023-25).
Ka Aastha kaba long kawei napdeng ki 20 ngut ki samla pule kiba wan shakhmat ha ka jingpule na ki B-Schools ha ka ri India kiba la pynpaw ïa ka jingproh jabieng ha ka jingpynlut por ban pyndep ïa ka jingpule ha ka MBA. Ki la pynpaw ka jingsngewnguh ïa ka OP Jindal Group kaba la ai ka jingithuh na ka bynta ban ïoh ïa ka baibam.
