Nongpoh, Lber 19 : Hadien ba u Bah Sosthenes Sohtun u la shah jied biang ha ka sien kaba ar kum u nongmihkhmat paidbah na Jirang Constituency ha kane ka election jied nongmihkhmat kaba dang shu dep shen hapoh ka jylla, ka NPP Jirang Block Committee, GS Road bad Highway Area’s Leaders mynta ka sngi ki la pynkup burom ïa utei u nongmihkhmat halor ka jingjop don burom jong u kum u nongmihhmat ban mihkhmat biang ïa ka Jirang Constituency.
Ïa kane ka jingpynkup burom la pynlong ha CTI Auditorium Hall, Byrnihat ha kaba la wan ban shim bynta da ki nongïalam bad ki dkhot ka NPP Jirang Block bad la don ryngkat ruh u MDC ka Jirang, u Bah Victor Rani ban leh burom ïa u Bah Sosthenes Sohtun kum u MLA ba la pynjop don burom da ki paidbah ka Jirang Constituency.
Kane ka dei ka sien kaba nyngkong eh ba ki nongïalam ka NPP ki la pynkup burom ïa u Bah Sosthenes Sohtun hadien ba u la shah jied biang kum u MLA ka Jirang ha ka sien kaba ar, kaba dei hadien ba u la jop ha kane ka election MLA ba dang shu dep shen ha ka jylla.
Ha kane ka jingpynkup burom ïa u Bah Sosthenes Sohtun, la ai burom ruh ïa u da ki jingai sngewbha ki ban long ki dak sah jingkymmaw kum uta u nongmihkhmat paidbah na Jirang Constituency bud sa ki jingrwai na ki khynnah skul bad ki samla ban pynphuh pynphieng ïa kane ka prokram pynkup burom ïa u nongmihkhmat paidbah ba la shim khia da ki nongïalam ka NPP Jirang Block na GS Road, Byrnihat.
Ki nongïalam ka NPP Jirang Block bad kynthup ruh u MDC, u bah Victor Rani, haba kren ha kane ka jingïalang pynkup burom ki la ai burom ïa u Bah Sosthenes Sohtun kum u MLA ba la pynjop biang da ki paidbah ka Jirang bad ki la pynpaw ruh ka jingsngewnguh ba dei tang une u MLA hadien 30-35 snem ba ka Jirang tang hapoh ka san snem ka la ioh mad shibun ki jingkylla ha ka liang ka roi ka par jong ki paidbah.
Kum ki nongïalam ki la pynpaw ruh ka jingkmen ba ki ioh ïa uta u nongmihkhmat ba don ka jingkitkhlieh na ka bynta ki paidbah bad ki khmih lynti ruh ba ha kane ka sien kaba ark aba un mihkhmat biang kum uta u nongmihkhmat paidbah un dang lah ban wan rah shibun ki jingkylla hapoh ka Jirang Constituency.
Na ka liang u Bah Sosthenes Sohtun kum u MLA ba la shah pynkup burom, u la ai khublei kyrpang ïa ki nongïalam ka NPP Jirang Block Committee bad baroh ki nongkyrshan na Jirang Constituency, namar dei lyngba ka jingkyrshan ba radbah jong ki wat hapdeng shibun ki jingshah pynthohbria ka party NPP bad ïa u kum u MLA hynrei ki la poi biang sha ka thong jogn ka jingjop na ka bynta ban bteng biang ïa ki kam shakri na ka bynta ka jingdonkam jong ki paidbah hapoh ka Constituency.
Shuh shuh, kum u Nongmihkhmat ba la pynjop biang da ki paidbah ka Jirang Constituency ha ka sien kaba ar, u Bah Sosthenes Sohtun u la ai ka jingkular sha ki paidbah nongkyrshan bad sha baroh kiba khlem da kyrshan ruh ba un dang pynjanai shuh shuh ïa ka jingshakri, namar ka thong hi ka long ban wan rah shibun ki jingkylla hapoh ka Constituency nalor ki kam kiba u la trei hapoh ka san snem ba u la long u nongmihkhmat ka Jirang Constituency, u la bynrap.
