Nongstoiñ, Lber,18: Ka WKSU Central Body lyngba ka education cell ha ka sngi thohdieng jong ka taiew, ka la pynlong ka jingleit jurip ïa ka jingshna ïa ka ITI building kaba don ha ka shnong Sohpian Nongstoiñ, kaba la mang tyngka da ka sorkar ha ki katto katne ki snem ba la dep kaba la kot ïa ka shi klur tam.
U education secretary ka seng u samla L.Khardewsaw, u la pynkynmaw ba ka ITI ka la ai ïa ka jingshakri la bun snem ha ka District, hynrei la shakri pat sha ki samla da kaba shu pyndonkam da ka ïing wai wat haduh mynta mynne. Hynrei, u la ong ba lyngba ka jingpynsngew jong ka Directorate of Employment and Craftmen Training sha ka seng ban pynïoh ïa ka jaka ba biang ban shna ïa ka ITI office, ka seng ka la pynïoh ïa ka jaka ha ka shnong Sohpian.
U la ong ruh ba ka jingthmu jong ka jingjurip, ka long ba ka rukom trei ïa katei ka building ka long ne em katkum ka plan ne criteria ba la buh. U la pynkynmaw ruh ba I contractor ba dei ban trei I dei ban trei bha bad bud ryntih ïa ki criteria ne ka plan, khnang ba kan ai ka jinghun bad jingshngaiñ ban pyndonkam ïa ka hadien ba la dep.
La pynkynmaw ba katei ka shlem ka don bun ki bynta jong ka jingpyntbit ba ki samla ki kwah kum ka fitter, plumber, wireman ban kiwei kiwei, ba ki samla kiba kwah ban jied ki lah ban ïoh. Ka seng ka pynpaw ruh ka jingkyrmen ba yn ym slem shuh ba ka ITI kan sa ïoh noh la ka permanent building.
Ka seng kan sa buddien ïa ki jingpyntrei ïa ki government building ha ka thaiñ, ba kin ai jinghun bad lada shem ba ka jingtrei ïa ki building kim ai jinghun, ka seng ka hap ban shim da kiwei ki rukom pyrkhat la bynrap u education secretary L. Khardewsaw.
Ha kajuh ka sngi ka seng ka la pynlong ka jingbuddien ïa ka jingshna ïa ka building jong Polytechnic kaba la sdang naduh u snem 2018 kaba don ha ka shnong Mawrusyiar Nongstoiñ. Ha kane ka jingleit jurip, la shem ba ka jingtrei ïa kane ka building ka dang sah rynghang bad sangeh noh khlem pat lah pyndep ïa ka jingshna.
La lap ba ka daw jong ka jingslem bad jingsangeh noh ban trei, ka dei ka jingbym lah ka sorkar ban pyllait ïa ka bill sha ki contractor. Kane ka jingbym ïaid beit ha ka jingpyntrei ïa kine ka jingtrei, ka la pyndiaw ïa ka seng khamtam ïa ki samla ka thaiñ kiba duk ki bym lah ban leit pule shabar ka jylla ne wat sha ki jaka ba hapoh ka jylla kham jngai na ka jaka ba ki don. Kumta ka seng ka pynkynmaw bad kyrpad ïa ka sorkar lyngba ka education department, ba kan shimkhia ïa kane ka kam, khnang ba kan long ka jingkyrkhu ïa ki samla ka dong ka thaiñ.
U education secretary ka seng u la pynpaw ruh ïa ka jingsngewnguh ïa u trai khyndew u bah Phre Khardewsaw, u ba la kloi ban synñiang ïa ka jaka sha ka sorkar ha ryngkat ka jingïasngewthuh lang bad ka shnong Mawrusyiar. U la bynrap ruh ba lada u trai khyndew u kloi ban ai ei ïa ka khyndew sha ka sorkar na ka bynta ban tei ïa ka tei ka shlem ai jinghikai, kumta ka dei ka kamram jong ka sorkar ban shimkhia ha ka ban pynurlong.
La pynkynmaw ruh ba lada ki jingtrei ïa ki building bapher bapher ha ka thaiñ kim long kiba ïaid beit, ka seng kam banse ka hap ban shim da kiwei ki sien jam ban buddien, ong u education secretary samla L.Khardewsaw.
