Khliehriat Lber 18 : Ka Company dewbilat jong ka Star Cement kaba don ha Lumshnong, lyngba ka tnat CSR, mynta ka la sdang ban pynkhreh shaid shaid ban ai bor ding , da ki Solar Light ha ki shnong kiba don ha elaka Narpuh, East Jaiñtia Hills District, kiba kynthup ka shnong Pandare, Lum Tongseng, Sakhri, Sonapyrdi, ha Khaddum bad ha Lumshnong.
Ïa ka jingpyntrei ïa katei ka project, Solar Light la sdang na ka shnong Pandare ha ka jinglut kaba T1.2 lak tyngka bad shen yn sa sdang noh ban pyntrei ha Lum Tongseng, Sakhri, Sonapyrdi, ha Khaddum bad ha Lumshnong ruh.
Kumjuh ruh, ka jingpyntrei ïa kawei ka jingkieng hapoh shnong Lumshnong ka dang ïaid shakhmat ha ka mang tyngka kaba T 30 lak tyngka, ïa kane ka jingkieng la shna ha ka dong Wahlaru (Lumshnong) ha kaba ki kali rit ki lah ban ïaid na kane ka jingkieng, kane ka jingkieng kan ïarap shibun ïa ki nongshong shnong ha ka leit ka wan bad ha ka kit ka bah.
