Pynkhreh shaid shaid ka Balang Presbyterian Nongpoh ban pynlong ïa ka jingïaseng Synod kaba XXV
Nongpoh, Lber 18 : Ka Balang Presbyterian Nongpoh, Ri-Bhoi Statei Presbytery kala pynkhreh shaid shaid ban pdiang bad pynlong ïaka jingïaseng Ri-Bhoi Synod kaba XXV, haka juh ka por ban rakhe ruh ïaka jingdap 25 snem (Jubili Rupa) jong ka Ri-Bhoi Synod ka ba la sdang naduh ka 15 tarik mynta u bnai haka Balang Presbyterian Nongpoh bad pynkut pat haka 19 tarik ha madan NSCA Pahamsyiem.
Naka liang ki khun samla jong ka Balang Presbyterian mynta ka sngi kila pynkhreh pynkhrum ban shim bynta ruh haka jingpynkhuid ïaki surok bah, naduh ki ñiut ki ñier, ki plastic naka bynta ka jingïaseng ka ban long lashai ka sngi ha madan Pahamsyiem.
Khnang ba kan nym wanrah ka jingthud haka leit ka wan bad ka jingdheng kali la kyrpad ruh ïaki paidbah ba ki dei ban bud ryntih ïaki jaka buh kali kumba la pynbeit da ka Synod ba kynthup ïa baroh ar linag ki Service Road jong ka NHAI, Madan Shnong Iew Mawlong, St. Paul Hr. Sec. School Campus, Mawroh, Ri Bhoi College Campus, Maw diangum, Jaka I Dr. D.D. Lapang hajan Ingmane Balang Presbyterian Nongpoh, Nomiwell School Campus, Sajer, jaka Syndah jong ka NSCA, jaka jong ki Kur Phawa pyrshah ïa ka Canara Bank Nongpoh.
La pyntip ruh haor ka jingpynbeit ïa ka rukom pynieng kali ki kynthup ïa kito kiba wan na Thain Umroi, Mawhati, Umsning bad kiwei kiwei ki jaka kiba na shaneng kin pynïeng ha Ri Bhoi College Campus bad ha ka Service Road naduh Ri-Bhoi College, kiba wan na ki thaiñ Umden, Umsawnongbri, Marngar kin Pynieng sha ka jaka I Dr. D.D. Lapang bad sha Madan Iew Mawlong, kiba wan na ki thaiñ Nongkhrah kin pynïeng ha Madan St. Paul Hr. Sec. School, Nongpoh, ki ba wan na ki thaiñ Umling ter ter kin pynïeng ha Service Road jong baroh arliang naduh na Police Point Nongpoh Gate bad Madan School Nomiwell Sajer bad na ka bynta ki VIP kin pynïeng ha syndah ka NSCA Stadium.
Kumta, na ka liang ka ka Balang Presbyterian Nongpoh, Ri Bhoi Shatei Presbytery bad ka District 12 Lyngdoh shatei ki khmih lynti ïa ka jingïatreilang ki paidbah riewngeit ryngkat bad ki jingpynbeit jong ka Reception Committee jong ka Ri Bhoi Shatei Presbytery ban ïaid beit ïaid ryntih kane ka jingïaseng Synod bad la khot la wer ruh ïa baroh ki paidbah sha katei ka jingïaseng bam sngap ïaka ktien u Blei.