Nongpoh, Nailar 19: Kumba 85 ngut ki samla kiba la pyndep bad kiba la wan shakhmat haki eksamin Under Graduate naki shlem pule bapher bapher naka them Ri-Bhoi, mynta ka sngi kila shah pynkup burom haka skulbah Mahatma Gandhi University, 13 mer Tamulikuchi haka jingïalang kaba shongkun bala long ha Parish Hall ha Nongpoh.
Ha kane ka jingpynkup burom u Bah Himalaya Shangpliang nongaibuit ka tnad pule puthi ka jylla u la shim bynta kum u kongsan haka jingdonlang u MLA ka Nongpoh u Bah Mayral Born Syiem, u Dr Abhishek Saini Deputy Commissioner ka Ri-Bhoi, u Bah R Shadap District School Education Officer, u Dr. Sagar O’ Manjare Vice Chancellor ka skulbah MGU, ki principal naki college bapher bapher, ki samla pule lem bad kiwei kiwei ki riew rangbah.
Kane ka dei ka sienjam bala shim da katei ka skulbah da ka jingangnud ban ai mynsiem ïaki samla pule bad kumjuh ruh ban sam jingtip kumno ban jam sha kiwei kiwei ki jingpule ba kham shalor namar ka don ruh ka prokram kyrpang naka bynta ki samla pule ha katei ka sngi hadien ka jingpynkup burom.
Haba kren ha kane ka sngi naka liang u Bah HM Shangpliang bad u Bah Mayral Born Syiem kila ai ka jingkhublei kyrpang ïaka skulbah MGU kaba la shim ïaka sienjam ban pynkup burom ïaki samla pule naka district kiba la pyndep bad wan shakhmat haka eksamin Undergraduate bad kane ka dei ka jingsdang jong ka jingïaid lynti ban poi sha ki bynta bapher bapher ba kum ki samla ki angnud haka jingim jong ki.
Kila kyntu ruh ïa kitei ki samla kiba la ïoh pdiang ïaki khusnam ha katei ka sngi ban im sngi ka jingim kaba don akor bad tipbriew tip blei bad khamtam ban minot thop haka jingpule kumba ki kmie ki kpa ki ai ka jingnang jingstad bad angnud ba ki khun kin im bha bad seisoh haka jingim jong ki.
