Shillong, Nohprah 06: Ha ka kam kum u Administrative Manager jong ka kynhun kriket ki kynthei ka ri India, u President jong ka synjuk Meghalaya Cricket Association – u Nababrata Bhattacharjee u la shah pynkup burom ha ka Queensland Cricket Board ha ka jingïalang ha Brisbane kaba la long hynne ka sngi Thohdieng.
Kane ka jingai-khublei ka la long ha ka jingïalang ba la pynlong da ka tnad treikam jong ka Indian Consulate General ha Brisbane.
Ha kane ka jingïalang la ïadon ryngkatlang u Neetu Bhagotia – Consul General, Chair jong ka Queensland Cricket Board ka Kirsten Pike bad kiwei ki heh ki haiñ, kynthup ïa ki dkhot ba pawkhmat jong ki nong India kiba sah shabar ri. U Bhattacharjee ryngkat bad u coach ka kynhun u Amol Majumder ki la shah pynkup burom ha ka Kirsten Pike.
Haba kren na bynta ka kynhun ïalehkai ka India, u Bhattacharjee u la pynpaw ïa ka jingsngewnguh halor ka jingleh bha jong ka consulate ha kaba ka kapten jong ka kynhun, ka Harmanpreet Kaur u la aiti ïa ka sopti jong ka India ba la soi da baroh ki nongïalehkai sha u Consul General.
Ka kynhun ïalehkai jong ki kynthei ka India kan don bynta ha ar tylli ki jingïalehkai ODI series pyrshah ïa ka Australia. Ka la mad ïa ka jing shah rem ha ka jingïalehkai kaba nyngkong da 5 wiket hynnin ka sngi Palei bad kan sa ïalehkai biang lashai ka sngi U Blei.
