OC Blue SPL 2024: Watla shah lamkhmat shuwa wanphai ka Nongrim Hills bad ka Nangkiew Irat da ka jingjop

Shillong, Nohprah 06: Ka Nongrim Hills SC bad ka Nangkiew Irat SC – baroh ar kynhun ki la lah ban wanphai nadien watla shah lamkhmat shuwa ban pynliem ïa ki kynhun liang pyrshah jong ki ha ki jingïalehkai ka lympung OC Blue Shillong Premier League 2024 ha SSA Stadium – First Ground, Polo, ha ka sngi Thohdieng.
Ka Nongrim Hills ka la lah ban pynliem noh ïa ka Langsning FC da 4-3 kol ha ka jingïalehkai kaba nyngkong shuwa ba ka Nangkiew Irat kaba la shah pynduna sha ka 10-ngut kan pynliem ïa ka Nongthymmai SC da 4-2 kol.
U Alem Khongwir (3′), Mebanshan Suting (65′) bad u Glennys Lynrah (87′, 89′) ki la pynkhihjar na bynta ka Nongrim Hills. Kiba la pynkhihjar na bynta ka Langsning ki long u Lamgougin Khongsai (13’), Daohipaia Rymbai (46’) bad u Enestar Malngiang (83’).
Baroh arliang mamla ki la ïoh ban lamkhmat arsien ha ka jingïalehkai hynrei ka Nongrim Hills ka la ïoh ïa kaba kongsan tam, ha kaba kane ka kynhun ka la ïoh ban tam hakhmat haduh ka minit ba khatduh ban khur pura ïa ki 3 poiñ. Lah ban kdew ruh ba ka Nongrim Hills kam shym la ïoh pynkhihjar wat tang shi kol ruh ha ki lai tylli ki jingïalehkai ba la dep hynrei mynta ka sngi ka la thep saw kol pyrshah ïa ka Langsning kaba la ïoh clean sheet (khlem shah thep kol) tang shi sien baroh shi samoi bad ka kynhun kaba la shah thep bun tam ban ïa kano kano ka kynhun.
U Alem u la lah ban pynliem ïa u rangapkol ka liang pyrshah – u Rajat Paul Lyngdoh ban pynkhih ïa ka kol kaba nyngkong hynrei u Lamgougin u la pynïakhaid tang10 minit hadien. Ka jingpyrshang kaba nyngkong jong u ka la tyngkhuh ïa u crossbar bad ka la wan biang ha madan, kaba la ailad ïa u ban ïoh sa shi sien ïa ka kabu, bad u la lah ban pynurlong.
Tang mar ïa bteng ka kylla miet u John Lalrinawma u la pashat ïa ka bol kaba itynnad na ka bynta u Daohipaia na ka liang kadiang ban shu pyndei tiak sha kol bad kane ka la pynlong ïa ka Langsning ban lamkhmat ïa ka jingïalehkai. Hynrei u Mebanshan u la pynïakhaid na bynta ka Nongrim Hills kumba 20 minit hadien.
Ka jingïakhun ha ki 10 minit ba khatduh ka la long kaba jur bha, ha kaba u Enestar u la pynkhih da ka khlieh lyngba ka bol pashat na u Roikhihbha Nongtdu ban buh biang ïa ka hakhmat ïa ka Langsning da kaba tam shi kol. Kham hadien, u Glennys u la pynkylla ïa ka jingïalehkai da kaba thep ïa ka kol tang hadien 60 sekhon ba u la mih madan kum u nongïalehkai ba bujli (substitute) bad nangta u la pynkhih biang sa shi kol ha ka minit kaba 89 ban ai ïa ka Nongrim Hills ka jingjop kaba sah jingkynmaw.
Ha ka jingïalehkai kaba bud, u Wallamsuk Nongkhlaw (54’, 80’) bad u Ronaldkydon L Nonglait (70’, 90’) ki la pynkhijar na bynta ka Nangkiew Irat, katba u Ronald Singh Shaikom (44’) bad ka Sorokhaibam Meitei (61’) ki la thep na bynta ka Nongthymmai.
U Ronald u la thep ïa ka kol ba nyngkong na ka volley kaba itynnat ban pynlong ïa ka Nongthymmai ban ïoh lamkhmat khyndiat minit shuwa ban kut ka kylla step hynrei ka jingbakla na u Nitish Hazra ha ka kylla miet ha kaba une u rangïalehkai ba shadien u la kynjat beit beit ïa ka free-kick sha u Atlanson Kharmaw ka Nangkiew Irat, uba la pashat ïa ka bol sha uWallamsuk ban pynïakhaid ïa ka jingïalehkai.
Nangta u Sorokhaibam u la ïakhun shitom ban buh biang ïa ka Nongthymmai hakhmat bad ki la khmihlynti ruh ban khur ïa ka jingjop hadien ba u Restom Khriam (rangïalehkai ka liang pyrshah) u la shah beh shi syndon naba ïoh ar sien ka yellow card, kaba la pynsah ïa ka Nangkiew Irat da tang 10 ngut ki rangïalehkai na bynta ki 25 minit ba dangsah.
Hynrei wat hapdeng ka jingduna player, ka Nangkiew Irat ka la ïoh ban thep lai kol. Ka kol ba khatduh la ïohi ba u rangap kol ka Nongthymmai u Akash Thapa u la mih shabar bad um lah ban tehlakam ïa ka kol, kaba la plielad ïa u Ronaldkydon ban thep suk ïa ka bol sha ka kol kaba thylli.
Lyngba kane ka jingjop ka la kyntiew ïa ka Nangkiew Irat sha ka kyrdan ba lai ha ka miej da kaba kamai 12 point. Mynta ki don haduh saw tylli ki klob kiba kamai mar 7 poiñ, kata naduh ka kynhun ba bat kyrdan ba 6 haduh kaba 9. Haba pynshong nongrim katkum ka resol jingïakhun hapdeng jong ki (head-to-head result), ka Nongthymmai ka wan hakhmat napdeng kine, bud sa ka Nongrim Hills, Langsning bad Laitkor SC.
Ki jingïakhun ban wan ha ka OC Blue SPL 2024 kan long ha ka sngi Nyngkong. Ka Laitkor kan ïakhun pyrshah ïa ka kynhun kaba don sha trai duh ka Ryntih FC ha ka por 11:30 baje mynstep bad bud sa ka Nangkiew Irat pyrshah ïa ka Nongrim Hills haka por 2 shiteng mynsngi.