Shillong, Nohprah 06: Ka Meghalaya Sport Climbing and Mountaineering Association (MSC&MA) ka la pynlong ïa ka jingpyrshang ban jied nongkiew lum (state level sport climbing selection) kiba tbit ha ka kynroh lum jong ka 58 Gorkha Training Centre kaba don ha Happy Valley, Shillong, ban jied ïa ki nongïashim bynta ki ban mihkhmat ïa ka jylla ha ka jingïakob kiew lum jong ka North East Zone Sport Climbing Competition 2024 bad ruh ban pynkhreh ïa ka 6th Meghalaya Games ban wan.
Ka jingïakop kiew lum na bynta ki jylla North East kan sdang ha ka taïew ba lai jong u bnai Nohprah katba ka Meghalaya Games kan long ha u Kyllalyngkot.
Ha kane ka sngi la ïadon ryngkatlang u Director ka tnad Sports & Youth Affair, u D.D Shira kum u kongsan. Ka tnat sports jong ka jylla ka la ai jingkyrshan ïa ka jingpynlong ïa kane ka jingpyrshang kaba ar sngi lynter ha ka 04 tarik bad 05 tarik mynta u Nohprah.
Baroh ki don 52 ngut kiba la wan ïashimbynta kiba kynthup naduh Garo Hills, Jaintia Hills, Ri-Bhoi, West Khasi Hills bad East Khasi Hills, katkum ka jingïathuh jong ka MeSCMA ha ka kyrwoh ba la pynbna hynnin ka sngi Palei.
Ka synjuk ka la pynpaw ruh ïa ka jingsngewnguh ïa u Commandant jong ka 58 GTC uba la ailad ïa ki dkhot bad ki nongkiew lum ban pyndonkam ïa ka kynroh lum ban pynlong ïa kane ka jingpyrshang kiew lum bad ruh ban ai jinghikai.
