Pynkup burom ka ophis u DC -EJH ïa ka ANM ba ïoh ïa ka nam Florence Nightingale lem ki ANM

Khliehriat, Jymmang 24: Ka ophis u Deputy Commissioner ka East Jaiñtia Hills District ryngkat bad ka tnat ka koit ka khiah, EJHD mynta ka sngi ki la pynlong ïa ka jingialang pynkup burom ïa ka ANM kaba ioh ïa ka nam Florence Nightaingale, ka kong Leitmon Paslein, na Samasi Sub Centre, lem bad ki saw ngut kiwei pat kiba kynthup ka kong
Kijuhhi Langstang bad ka kong Manbhadakani Lyngdoh, kiba dei ki ANM jong ka Ryngkoh Sub Centre bad ki ANM na Jalaphet Sub Centre ba kynthup ka kong Nidawan Chyrmang, la pynkup burom ïa kine namar ki kam kiba radbah ba ki la leh, iya ka jingialang la pynlong ha ophis treikam u Deputy Commissioner ha Khliehriat.
Haba kren ha ka jingialang u Deputy Commissioner ka East Jaiñtia Hills District, u Abhilash Banarwal, IAS, u la ong ba kane ka jingialang ka long ban rakhe pyndonburom ïa kine ki san ngut ki ANM napoh ka district kiba len ïalade kiba la lah ruh ban trei ïa ki kam ba radbah ban iarap ïa ki longkmie kiba ar met, u la ai khublei ruh ïa ka District Immunization Officer (DIO) East Jaiñtia Hills District, ka Dr Nidanom Suchiang, ka Medical Officer jong ka Sutnga CHC, ka Dr R.Toi, kiba trei shitom lang ban kyntiew ïa ka bha ka miat ha ka liang ka koit ka khiah bad kiba ju ai ka jingkyrshan bad jingiatreilang bad ki para nongtrei ha kano kano ka por,u la ai mynsiem ïa ki kumjuh ruh ïa ki ANM ba kin nang iai bteng shuh shuh ïa ki kam ba bha jong ki ha ka imlang ka sahlang.
U Abhilash, u la ong ruh ba naduh ba u shimti ïa kane ka kam kum u Deputy Commissioner, u la shim khia ban bud dien ïa ki kam kiba naduh ki Sub Centre, ki Public Health Centre bad ki CHC, khnang ban kyntiew iaka koit ka khiah hapoh ka district, la ong ruh ba ki don shibun ki skim kiba na ka sorkar pdeng kumjuh ruh na ka sorkar jylla ki ban iarap ïa ki longkmie kiba ar met bad ong ruh ba ryngkat ka jingiatreilang bad ka tnat ka koit ka khiah la lah ban bud dien ïa ki jingtreikam ki ANM bad la lap ba ki don ki ANM kiba la lah ban leh ïa ka kam pynkha khyllung bad lap ruh ïa ki kam kiba bha bad ki kam kiba radbah ba ki leh ha ki shnong ki thaw kiba hap hapoh ki Sub Centre jong ki, u la ai mynsiem bad pynshlur ïa ki ba wat hapdeng shibun ki jingeh ba ki iakynduh ba kin nang iai bteng shuh shuh ïa ki kam ba bha jong ki.
U Deputy Commissioner, u kular ruh ba un shim khia ban pynbit pynbiang bha noh iya ki iïng Sub Centre bad pynbiang ruh iya ki tiar sumar kiba donkam ba kan nym buh jingeh ïa ki doctor bad ki ANM ha ki Sub Centre.
Ki ANM kiba la ai jingkren ki la pynpaw ïa ki jingeh kiba bun ba ki iakynduh ha ki jingtreikam ba radbah jong ki ha ki shnong kyndong hynrei da ka jingkmen bad da ka mynsiem sngewlem ki trei hok ïa la ka kam kaba long shibynta ban iarap ïa ka imlang ka sahlang ha kaba iadei bad ka kha ka pun jong ki longkmie kiba armet kiba donkam ïa ka jingiarap jong ki ha kano kano ka por, wat la ka dei shiteng miet, watla ha ka por slap ne por khriat ruh ki long kiba kloi ban iarap.
U Addl. Deputy Commissioner, East Jaiñtia Hills District, u bah Jonathan Shylla, MCS, haba pynsngew ïa ki kam ba radbah jong kitei ki ANM na East Jaiñtia Hills, u la ong ba ki dei ki ANM kiba shim khia shisha ïa ka kam khamtam ban iarap ïa kito kiba donkam ïa ka jingiarap, ka kong Leitmon Pasleiñ, ka ANM jong ka Jalaphet Sub Centre ka la lah ban iarap haduh 121 ngut ki longkmie kiba kha khyllung, kynthup kito kiba kha ha iïng bad ha Sub Centre bad ki briew ki la tip bha ïa ka jingiarap sbun mynsiem jong ka, ka la iohpdiang ruh ïa ka nam Florence Nightingale 2021 kaba dei ka burom kaba ha khlieh duh jong ki nurse ha ka ri.
La ong ba ka Kong Agnes Syrti, ka ANM jong ka Jalaphet Sub Centre ka la iarap 16 ngut ki longkmie ha kaba pynkha khyllung ha ki iïng bad kumjuh ruh lai ngut ki longkmie kiba ka la pynkha khyllung ha ki kali ki bym lah shuh ban poi sha ki Sub Centre ne sha ki PHC, kane ka la pynpaw ïa ka jingshlur bad jingskhem jingmut bad ka jingshim khia jongka ha ka kam ba ka trei.
Ka kong Kijuhhi Langstang, bad ka ANM, ka kong Manbhadakani Lyngdoh kiba dei na ka Ryngkoh Sub Centre, la ong ba kine ruh ki ju shim khia haduh katta katta ïa ka kam khamtam ha ka kam pynkha khyllung, ki ju pynrung ïa ki kyrteng ha ki register bad ki ju bud dien ruh ïa ki longkmie kiba ar met, watla ka iïng Sub Centre kam pat da bit da biang bha, hynrei watla katta ruh ki la lah ban iarap ban pynkha khyllung haduh 25 ngut ki longkmie bad trei shitom ruh haduh ban da poi 100 percent ki longkmie ba ar met kiba wan ai injek bad kane ka Sub Centre ka dei ruh kawei kaba la poi haduh 100 percent kiba wan ai injek covid-19 ha ka thup jong kiba 18 snem shaneng.
Ka ANM jong ka Jalaphet Sub Centre, ka kong Nidawan Chyrmang, kadei kawei na ki ANM kaba trei shitom, kaba trei hok ïa ka kam bad kaba wanrah ïa ka jingkiew ka Sub Centre, naduh u snem 2017 ka la pynkha khyllung haduh 104 ngut ki longkmie ha iïng jong ki, la ong ruh ba ka la pyntbit ialade kumba leh ki men ba rim da kaba pyndonkam da ki siej bad kawei kaba sngewtynnad ban tip ruh ba ka kong Nidawan Chyrmang ka khlem kyntait ban iarap ïa ki longkmie ha ka kam pynkha khyllung watla ha ka por ba ka dang don ialade ruh ha ka shuthi kha khyllung (Maternity Leave).
Haba kren ha ka jingialang, ka ANM kaba na Samasi Sub Centre ka kong Letmon Paslein kaba la ioh ïa ka nam kum ka Florence Nightingale ha u snem 2021 ka la iathuh bad ong ba ma ka lem bad i kong Agnes Syrti, iba dei ruh i ANM jong ka Samasi Sub Centre ki ju ïa leit ban iarap ïa kiba donkam jingiarap bad ong ruh “Watla ka sorkar kala bthah ba baroh ki kynthei ba ar met ki dei ban leit kha sha ki hospital ne sha ki PHC ne sha ki Sub-Centre hynrei don bun ki bym lah ban leh ïa kata namar ka jingban ka jingduk, te haba ngi la dep shah hikai te ngi hap tip hi bad ngi hap leh, kane ka dei kawei na ki kam ialap kaba wanrah jingbha ha ka imlang ka sahlang ban long kiba koit ba khiah, khamtam ha ki jaka nongkyndong bunsien ngi shem bad ngi lap ba lada ki briew ki ong ba kim don pisa ka da long shisha kaba shisha ba kim don pisa namar ka jingban ka jingduk, kim lah ban pynpoi ïa ki longkmie sha ki hospital ban kha khyllung, namar tang ka bai kali ruh kim don, te ngim banse ban iarap, lada ki wan khot ban synran lang ïa ki bad haba ki donkam jingiarap ngi iarap ïa ki” ka la pynpaw ruh ba ka ju iakynduh shibun ki jingeh ha ka jingiaidlynti jong ka kum ka ANM hynrei da ka mynsiem kaba kmen ka shim khia haduh katta katta iala ka kam bad ong ruh “nga ngeit ba u Blei un nang ai bor shuh shuh ïa ngi ban shakri ïa ka imlang ka sahlang ha kane ka kam ba ngi trei” pynpaw ka kong Leitmon Pasleiñ bad ka la ai mynsiem ïa kiwei kiwei ruh ki ANM ba kin nang trei khambha shuh shuh ïa ka kam bad ban lenlade na ka bynta ka bha ka miat ha ki shnong ki thaw.
Kumjuh ruh ka ANM kaba na Ryngkoh Sub-Centre, ka kong Kijuhhi Langstang kaba la pynkha khyllung haduh 25 ngut ki longkmie ha Ryngkoh Sub Centre ka la iathuh ba ka iakynduh jingeh haduh katta katta khamtam ha ka por lyiur ba jur slap ha kaba ka bor ding electric ha Sub Centre ruh ym don bad don ki por ba ma ka lem bad ka kong Manbhadakani Lyngdoh, kaba dei ruh ka ANM jong kane ka Sub Centre ki hap leit sha iïng jong ki longkmie ban pynkha khyllung, watla ka dei ha ka por miet ne synia ruh bad wat hapdeng u slap ki ju iaid da ka kjat ban leit iarap bad wat hapdeng ka jingbunkam kim ju kyntait ban iarap ïa ki longkmie ba kha khyllung kiba ha ki thaiñ Khahnar, Thuruk bad kiwei kiwei ki shnong kiba don ha katei ka thaiñ bad ki ju kyntu ruh ba ki dei ban shim shuh shuh ki lad jingsumar kiba kham biang na ka bynta ka koit ka khiah.
Ka ANM kaba na Jalaphet Sub Centre ka la pynpaw ka jingsngew kmen ba ka ioh pdiang ïa kane ka khusnam bad jingpynkup burom bad ong ruh ba kam ju poi pyrkhat ba kin don ki briew kiba peit bad budien ïa ki kam ba bha ba ka la leh ha ki shnong ki thaw, ka la ai ka jingkhublei ïa u Deputy Commissioner bad ïa ka tnat ka koit ka khiah, ka la iathuh ruh bad ki ju don ki por ba ki briew ki don hapdeng ka jingklumar jingmut haba ka por kha hynrei ka ju pynsngewthuh bad pynshai bad ai mynsiem ïa ki bad ong ruh ba ka lah ban leh ïa ki kam ba radbah ha kaba pynkha khyllung ka dei lyngba ka jingiarap bad jingai jingmut lang ka Doctor jong ka Sutnga CHC, ki ASHA bad ki Aganwadi, ki Supervisor “Don ki longkmei kiba kha khyllung ki bym long shuh wat tang ban shong kali ruh nga ju iarap ïa ki, don ki por ba ki briew ki dom ruh namar ba nga khlem rah dawai, hynrei ngam ju bat nud ïa ki, don pat kiba sngewthuh bad haba ki sngewthuh ka long ka jingai mynsiem lem iya nga, lada trei ha kano kano ka kam ruh donkam ban trei naduh ka mynsiem bad u Blei ruh um ju iehnoh ïa ngi” ong ka kong Nidawan Chyrmang.
Kiba la ia don lang ha kane ka jingialang ki kynthup ruh ka DIO East Jaiñtia Hills istrict, ka Dr Nidamon Suchiang bad ka Medical Officer jong ka Sutnga CHC, ka Dr R.Toi.
La pynkup burom ïa jitei ki San ngut ki ANM da ki momentos bad ki jingai sngewbha.