Mawkyrwat, Jymmang 24: Ka long ka jingkyndit bad pynlyngngoh ïa ka shnong baroh kawei hadien ka jingmih bad paw ha ki social media ha kaba ïa dei bad kawei ka jingjia ba shah bam duh kawei ka ïing hapoh shnong Kmawanrum, East Khasi Hills District kaba hap hapoh ka Mawsynram C&RD Block ha kaba ka jingjia bad ka jingpaw pyrthei katkum ka jingshisha kam ïa dei haei haei ruh em.
Namarkata, halor kane ka jingjia ka Dorbar Shnong Kmawanrum hapoh ka jingïalam jong u Myntri Shnong, u Secretary Shnong lem bad ki dkhot jong ka Executive Dorbar ki la ai ka jingpynshai paidbah ba kane ka jingjia pluh kawei ka ïing hapoh jong ka shnong kam dei kaba shisha. Hooid! ka la don ka jingpluh hynrei kam dei pat ka ïing shong briew hynrei ka dei ka ïing ban buh tang ki mar bym ju pyndonkam man ka sngi ne lah ban ong ba ka dei ka ïing buh khoh kum ki ïa ong hapoh shnong. Kumjuh ruh ha kane ka ïing katkum ka jingïathuh ba ki trai ba ju pyndonkam ban sah ruh kim pyndonkam shuh la kumba 3 snem ei ei hynrei ki la sah pat ha kawei na ki ïing ba na ka liang ka shnong lyngba ka ophis jong u Block Development Officer ka Mawsynram C&RD Block ki la pynshna lyngba ka skhim (Pradhan Mantri Awas Yojana) PMAY.
Ha kajuh ka por u Rangbah Shnong ka Kmawanrum, East Khasi Hills District ha ryngkat ki trai ïing ba la don ka jingjia pluh ka sem jong kine ka sem khoh, mynta ka sngi ka 24 tarik u Jymmang, 2022 ki la pynshai paidbah halor katei ka jingjia ba halor ka jingmih ha ki social media ba ka la don ka jingkynnoh ba ka Dorbar Shnong Kmawanrum ne ka Shnong Kmawanrum ka la leh shilliang khmat ïa katei ka longïing. Kumta halor kane ki kwah ban pynshai paidbah ba na ka liang ka shnong kam shem la don kum kata ka jingthmu naduh ba sdang bad kam shem leh shilliang khmat hi ruh ïano ïano ki longïing hapoh u pud u sam jong ka shnong, hynrei ki la leh katjuh ïa baroh kumba la rai ha ka Dorbar Shnong naduh ki snem kiba kham mynshwa.
Haba kren ha ki nongthoh khubor, u bah James K. Bani, Rangbah Shnong bad u bah Luckystar Nongsiej, Secretary jong ka Kmawanrum, East Khasi Hills District ha ryngkat ka jingïadonlang ruh ki katto katne ki ‘riew rangbah jong ka shnong ki la pynpaw ka jingsngewsih bad sngewkyndit namar kum ka shnong kam shym la don jingtip halor ka jingmih ba kynnoh ba ka shnong ka ieh beiñ ïa kane ka longïing khlem da ai ki lad jingïarap. Hynrei katkum ka jingpynshai ba ka jingmih ha ki social media ka la pynlehraiñ bad ka la long ruh ka jingpynjah burom ïa ka shnong ka thaw baroh kawei bad jynda la u nongpynmih ne u nongwan kylli jingkylli wan da ka dur ban don ka jingïakren sngewthuh jingmut shwa bad ka Dorbar Shnong kata ka la ïaid da kawei ka lynti namar kum ka shnong hi ka tip lut ïa kiei kiei baroh.
Kumta ki la buh ka jingkyrpad ba nangne shakhmat, kane ka jingmih ha kine ki sngi ka la long ka jinghikai ïa kiwei pat ba lada don kino kino ki jingjia hapoh shnong ba lada ki briew kiba nabar ki kwah ban leh ei ei ki dei ban don shwa ka jingïasngewthuh jingmut ne ïa kren shwa bad ka Dorbar Shnong khnang ba kan nym don kano kano ka jingshah kynthoh kumba ka la jia ha kine ki khyndiat sngi. “Kum ka Dorbar Shnong lada don kino kino ka jingjia khamtam kum ka ka jingjia pluh ïing kam shym la shong-kli-kti hynrei ka ïaleh kat lah i bor i ba rit ban ai ki lad jingïarap da ki tiar ki tar ne wat ban pynshna da ka ïing khnang ba kin shong kin sah bad lait na u slap bad ka lyer”, ong u Rangbah Shnong.
Ha kaba ïa dei bad ki kyndon shnong, u Rangbah Shnong u pynshai ba kum ka Dorbar Shnong ka don la ki kyndon hapoh shnong ba kino kino ki longïing kiba ieh ïingjah palat ïa ka lai snem ki dei lit noh namar ïa kane ka bynta kum ka shnong ka la leh kum lang ïa baroh ki longïing kiba dei hapoh u pud u sam jong ka shnong Kmawanrum. U Rangbah Shnong u la pynshai shuh shuh ba hadien ka jingjia shah bam duh jong ka ïing ne sem khoh jong ka kong Thij Lyngdoh kam shym la sngap jar hynrei u la phah ïa u Secretary Shnong ban ïa kynduh mar mar ïa u Gram Sevak ban wad ki lad ki lynti ba ki don ne em ki lad jingïarap, hynrei katkat kum ka jingïathuh hapoh jong u BDO ki shem jingeh ban leh ïa kata ne ban ai jingïarap hynrei la ong ba kin sa pyrshang ban thaw ki lad ki lynti, namar kam dei shuh ka ïing ba shong ba sah briew.
Ka kong Thij Lyngdoh kaba dei ka trai ïing ka la pynpaw bad ïathuh shai ba katei ka ïing kaba la ingkhong kam dei shuh ka ïing ba ki ju pyndonkam ban shong ban sah hynrei ka dei tang ka ïing ban pyndonkam ban buh ïa ki tiar ki tar namar mynta la lai snem kynthih ki la ieh ïing jah ba ki la sah ha kawei pat ka ïing thymmai ba ïoh bad shna lyngba ka skhim (Pradhan Mantri Awas Yojana) PMAY.
Katba u bah D. Nongsiej pat u la pynshai ba halor ka jingïalam ïa uwei u ‘YouTuber’ u ba wan ban ring dur im ïa ka ïing ba la shah bam duh ha ka ding naduh ka 22 Ïaïong, 2022, u la panmap ba dei ka jingbakla ka jong hi ba um shem ai jingpyntip lypa ha ka Dorbar Shnong bad kumjuh ruh wat ïa kiba ha ïing jong u halor ha jingwan lam ïa u nongwan ring dur ban wad jingtip halor ka jingjia kem ding jong ka sem khoh ne sem dieng. U la ong ruh da kaba shai ba kam don kano kano ka jingthmu ha kino kino ki bynta hynrei dei tang na ka daw jong ka jinglyngkot ka jingmut bad um shem poi pyrkhat ba kan jia haduh katne bad u la kum ïaid lait na ki bor shnong khlem da wad bniah ïa ka tynrai lyngba ka ïing ka sem bad kumjuh ruh na ka shnong ka thaw. U la pynpaw ruh bad u kwah ba ai ba kane kan kut noh tang hangne bad buh ruh kan jingkyrpad ïa ka ïing ka sem, ka shnong ka thaw bad ïa u YouTuber ba kin ïa map ïa ki jingbakla jong u.
