Nongpoh, Ïaïong 13: Da ka mynsiem jong ka jingsngewsarong, ki nongïalam ka NPP Tasku Circle ba kynthup na ki 10 tylli ki shnong ha katei ka thain Tasku, ha ka sngi Saitjaiñ ki la pynkup burom ïa u Bah Sosthenes Sohtun, MLA ka Jirang Constituency, kaba dei hadien ba u la shah jied ruh kum u MDC ka Jirang Constituency ha kane ka election MDC ba dang shu dep shen hapoh ka KHADC.
Ïa kane ka jingpynkup burom ïa u Bah Sosthenes Sohtuh kum u MDC ba thymmai, la pynlong ha ïing Dorbar ka Shnong Tasku, ha kaba kane ka jingpynkup burom ka long ka nongrim ban ai burom ïa u Bah Sosthenes Sohtun kum u MLA bad MDC ka Jirang Constituency.
Ki nongïalam ka NPP Tasku Circle, haba kren ha kane ka sngi, k la pynpaw ba la pynlong ïa kane ka jingpynkup burom kaba kyrpang, ka dei ka jingsngewkmen ba u Bah Sosthnes Sohtun um dei tang u MLA jongki bad mynta u la dei ruh u MDC jongki, hadien ba u la jop ha kane ka election MDC na Jirang Constituency.
Ki la pynpaw ruh da kaba ong, ba ki sngewkmen ba u Bah Sosthenes Sohtun u la dei lang u MLA bad MDC ha ka Jirang Constituency bad ka long ruh ka jingkmen ban pynkup burom ïa u, namar u dei u briew uba biang eh ban shakri ïa ki paidbah, uba sngewrit bad uba don ruh kata ka mynsiem jingtrei shitom na ka bynta ka jingmyntoi ki paidbah hapoh ka Jirang Constituency.
Na ka liang Bah Sosthenes Sohtun, kum u MLA bad MDC ka Jirang, haba kren ha kane ka sngi, u la pynpaw ïa ka mynsiem jong ka jingkmen, halor ka jingieit ki nongïalam bad ki paidbah bad tang kawei kaba u la buh ka jingkyrpad ka long ba ki nongïalam bad ki paidbah ka Jirang Constituency hi baroh kawei ba ki dei ban ai ka jingïatrei lang khnang ban dang lah shuh shuh ban dang saindur ïa ka Jirang Constituency ha ki liang baroh jong ki kam pynroi ba donkam u paidbah.
