Ha ka samoi u Narendra Modi khlaiñ ka jingïaid lynti ka ri India ha kiba bun ki kam: BJP

Shillong, ïaïong 13: Ka State BJP ka la pynlong ïa ka exhibition halor ka jingïaid lynti jong ka party mynta la kumba 45 snem, kaba dei ruh ka jingïaid lynti ban pynkhlaiñ ïa ka ri, khamtam ha kine ki 3 samoi treikam jong ka sorkar, ba la ïalam da u Myntri Rangbah duh ka ri naduh ba u la shimti ïa ka shuki.
Ha ki don jong u ha ka sorkar, ka party ka la shim bun ki sienjam ban pynthikna ïa ka jingkiew shaphrang jong ka ri bad ka bha ka miat ki nongshong shnong ha baroh kawei ka ri. Naduh ka thma bad ki shipai ka ri Pakistan ha Kargil hapoh ka jingïalam jong u (L) A.B. Vajpayee Ji, bad kiwei pat ki kam ba la shim ban ïakhun ïa ki kam lehnoh hapoh ka jingïalam jong u Myntri Rangbah duh ka ri u Narendra Modi Ji, bad ka jingïada ïa ka ri ka dei barabor ka kam kaba hakhmat jong ka party. Ka long kaba suk ban klet mynta ïa ki kam ki jam jong ka ri hapoh ka jingsynshar jong ka UPA 1 bad 2.
Ka jingbym kut ki kam shah thombor ha ki lehnoh, ka jingshah pynïap ki paidbah ba lui lui, ka jingsngewtieng ka la ktah bha ïa ka ri ha kito ki 10 snem ba la dep kaba la synshar bakla. Ban ai ka jingïaroh ïa ka sorkar u Narendra Modi, ba kitei ki sngi ba dap da ki jingtieng mynta ki la dei ki por ba la leit bad la pyntreikam bha ïa ka aiñ ha kaba kawei na ki kam lehnoh ha Tahawwur Rana ka la dei kawei na ki kam kiba la long ka nuksa.
Hapoh ka jingïalam jong ka BJP ha ka sorkar pdeng ka la lah ban ïarap ïa ki jingeh ki riewlum bad ka la shim ki lad ki lynti ban kyntiew ïa ka jingim jong ki riewlum ha kylleng ka ri. Da ka jingailad ka sorkar BJP hapoh ka jingïalam u Narendra Modi ka la pynlong ïa ka ri ban ïoh ïa ka president ba nyngkong na ki riewlum ka Shrimati Draupadi Murmu katba ha Chattisgarh u Myntri Rangbah riewlum u la shim smai.
La pynwandur ruh ïa kiba bun ki skhim da kaba buh jingmut na ka bynta ka bha ka miat jong ki riewlum khamtam kane ka thaiñ shatei lammihngi, nangta ka Waqf Bill ba dangshen kaba ai ka lad jingïada da ka aiñ ïa ki jaka riewlum hapoh ka Sixth Schedule ka la dei ruh kawei na ki kam kiba khraw ba la leh da ka sorkar pdeng.
Ka Meghalaya BJP ka la pynlong ruh ïa ka workshop ka jingïalap halor ki kam bad ban burom ïa u Dr. Ambedkar kaba long ruh kum ka jingpynngeit ïa ki nongshong shnong ba kin shaniah ha ka riti synshar ka ri.
Ha ka exhibition, ka party ka la pynpaw ruh ba kumno ka sorkar BJP Ghapoh ka jingïalam u Atal Bihari Vajpayee ki la don haduh 14 tylli ki amendment, bad u Narendra Modi ki don haduh 8 ki amendment kiba thmu ban ai ki jingbishar hok ha ka imlang sahlang. Haba phai pat sha ka Congress ka la leh barabor ban pynhiar dor ïa ka riti synshar ka ri.
Ka jingpynkylla ba nyngkong jong ka snem 1951 ka pyrkhing ïa ka hok ban ïoh kren laitluid kaba la wanrah ka jingshah pynrem ha ka por ka sorkar u Nehru. Hapoh ka Indira Gandhi, la wanrah ki jingpynkylla ban pynkupbor ïa ka Parliament ban pynkylla ïa ki Fundamental Right bad pyndkoh ïa ki property right ne hok nongkynti.
Ki sngi jong ka emergency ka dangneh kum kawei ka jingmong, u lyoh badum hapoh ka Indian history. Kumjuh ruh ka Congress kam kwah ban pynkynmaw ïa ki paidbah halor ka President rule ba la pynjari ha ki jylla la kumba 88 sien.
Ka BJP ka la kynthoh ruh ba kaei kaba ki thaiñ shatei lammihngi ki dei ban tip, kumba la pynpaw ha ka workshop, ka dei ba kita kiba khot ba kidei ki nongïada ïa ka rit synshar ka ri ki la long pyrshah ïa ka naduh kaba sdang. Ha ka shithi sha u Myntri Rangbah ha ka snem 1961 u Nehru u la pyrshah ka jingdon ka jingbhah kam da kaba ong ba ka long ka bym lah long. Hynrei na ka liang ka BJP pat ha kawei ka liang ka ïeng ban ïada ïa baroh ki hok hapoh ka ri synshar ka ri, kynnoh ka kyrwoh ba la phah da u Sabyasachi Ghose, Convenor, State Media Cell, BJP, Meghalaya Pradesh.