Pynkup burom ka JSM da ka khusnam ïa ki samla pule kiba jop ha ka ïakop thoh shithi sha u Myntri Rangbah

Khliehriat naitung 13: Ka Jaintia Students Movement mynta ka sngi ka la pynlong ia ka prokram ba kyrpang ha East Jaintia Hills District, ha conference hall ha East Side Inn Hotel ha kaba ka seng lyngba ka Education Cell ka la pynkup burom da ki momento bad ka pisa, ia ki hynriew ngut ki samla pule kiba na ri lum Jaintia kiba la jop ha ka jingiakop thoh shithi sha u Myntri rangbah ka jylla u Conrad Sangma bad ka phang pdeng jong ka shithi ka long ‘ ka jingshah ktah na ka jingshah khang dewiong bad shah ktah ka khaii ka pateng”.
Ki hynriew ngut ki samla pule kiba la jop ha kane ka jingiakop ki kynthup u samla Shaniahbha Shylla, na Jaintia Eastern College Khliehriat, ka Rini Lamurong, kaba pule ha Scent Acadamy Senior Secondary School Guwahati, u Zephaniah Dkhar uba pule ha Government Boys Higher Secondary School Jowai kine ki dei kiba na ka thup Season-I bad ki ba jop ha ka thup jong ka Season-II pat ki dei ki samla pule kiba pule ha Kiang Nangbah College, West Jaintia Hills District ba kynthup ka samla Etimon Sungoh, u Yolangmeki Thoo bad ka Pushpa Chetry.
Ki la don baroh haduh sanphew ngut ki samla pule kiba la iashimbynta ha kane ka jingiakop thoh shithi sha u myntri rangbah ka jylla, ha kaba arphew ar ngut ki dei na ka thup jong kaSeason-I bad arphew phra ngut na ka thup Season –II.
Haba kren ha ka jingialang, u President rangbah jong ka Jaintia Students Movement, u bah Leningstar Rymbai, u la ong ba ka seng ka la buh ia kaba kum kane ka jingiakop thoh shithi sha u Myntri-rangbah ka jylla ka long ba na ka por sha ka por ka seng ka ju iohi ia kiba bun ki jingeh jong ki longiing longsem ha ri lum Jaintia, ki jingeh jong ki longkmie, longkpa ban phah skul ia ki khun shabar, sha ki jaka ba kham jngai na shnong bad bun ki khynnah pule ki hap ban shu pep skul noh shiteng por na ka daw ka jingshah ktah ka ioh ka kot ki kmie ki kpa, na ka daw ba shah khang ban tih dewiong bad kum ka seng ka sngew ba ki khynnah skul, ki samla pule ruh ki don ka hok ban pynsngew ia ka sur halor ki jingeh ba ki iakynduh naduh ban khang ban trei dewiong.
Shuh shuh, u bah L.Rymbai u la ong ba ia ki shihi jong baroh kiba shimbynta ha kane ka jingiakop ka seng kan sa pynpoi ruh sha u Myntri rangbah ka jylla, u Conrad Sangma bad ka seng ka khmihlynti ruh ba u Myntri rangbah un pule ia ki shithi jong ki samla pule.
“Ka sur ki khun samla ka dei ka sur kaba khlain, kumta phi don ka hok ban pynsngew sha ka sorkar ban pyni ia ki jingeh ki kmie ki kpa ki iakynduh ha kaba pynlut pynsep na ka bynta ka pule puthi, ka sorkar ruh ka dei ban don lem ka jingkitkhlieh halor ki jingeh ki samla pule kiba kynduh jingeh na ka daw ba khang dewiong” ong u bah Leningstar Rymbai.
Haba kren halor ka jingshna ain halor ka kam dewiong, u nongialam ka JSM u kyntu jur ia ka sorkar ba ka dei ban burom ruh ia ka Rulling ba pyllait da ka iingbishar Supreme Court naduh u snem 2019 ba iadei bad ka jinglong trai ia ki khyndew ki shyiap ba kane ka jaka puta ka dei ban long trai hi da ki trai jylla kynthup ki jaka bad ki mar pohkhyndew, kaba mut ruh ba ka sorkar jylla ka dei ban ia iaid ryngkat ryngkat bad ka District Council khnang ba ki ain kin long ban iada ia ki trai muluk, ban iada ruh ia ka hok ki trai jylla ha ka iohkam ioh jam khnang ban ha ki sngi, ki snem ki ban wan kan nym don shuh ka jingpep shiteng por ki khynnah na ki shlem jingpule jong ki.
U Dr P.Nongtdu, u ai ka jingkhublei bad jingiaroh ia ka seng JSM kaba la wanrah ia kaba kum kane ka prokram kaba iadei bad ka jingshah ktah na ka jingkhang dewiong bad ka jinghiar ka ioh ka kot bad ong ruh ba kane ka dei ka synjam kaba donkam bha ba baroh ki naduh ki khynnah pule, ki khun samla ha shnong ha thaw bad baroh ki paidbah ba ki dei ban tip ia ka jingshah ktah na ka jingshah khang dewiong, kane ka ktah ym tang ha ri lum Jaintia hynrei ka ktah ia ka ioh ka kot ha ka jylla baroh kawei “Don ki thain kiba ym don dewiong kum ka thain Ratacherra, Umkiang,Bataw kiba ju wanrah ia ki mar rep jong ki sha ki jaka iew bad kane ka jingkhang dewiong ka ktah ia ka die ka thied ia ki ruh namar ka jingshah ktah ka ioh ka kot ki paidbah.
“Naduh 2014 la shah khang dewiong bad ka la don ka jingshah ktah ha ka pule puthi ki samla ka district, ka la don ka jingpep skul shiteng por, bun ki samla kiba pule shabar ruh ki hap ban wanphai noh bad bun ki skul ruh kiba hap khang khyrdep noh na ka daw ka jingbym biang shuh ka ioh ka kot jong ki longiing longsnem hapoh ka district” ong u Dr Nongtdu.
Kiba la ai jingkren ki kynthup ruh u Principal jong ka Jaintia Eastern College, u Dr Phervision Nongtdu, u General Secretary JSM, u bah Roitre Dkhar bad ia ka prokram la pyniaid da u Education Secretary JSM, u bah Welson.RD.Siangshai, ki dkhot jong ka JSM kiba la ia don ryngkat lang ha kane ka prokram ki kynthup u Assistant Education Secretary, u bah Heihokmi Supuh bad kiwei kiwei la ia don lang ruh ki kmie ki kpa jong ki samla pule kiba jop bad kiwei kiwei.