Ka ‘Rikynti Ka Rilum Khasi’ ban rakhe lyngkhuh snem ïa ka jingrwai ieit ri “Vande Mataram”

Shillong, Naitung 13: Ka sawangka ‘Rikynti Ka Rilum Khasi’ lane Virasat – The Eternal Hills, ha ka ktien phareng na ka bynta ban rakhe lyngkhuh snem ïa ka jingrwai ieitri “Vande Mataram” la pyniaid da ka Sangeet Natak Akademi, ryngkat bad ka Riti Academy of Visual Arts, ha ïing Dorbar Jaiaw Shyiap Lumpyllon, Shillong, ha ka 15 Naitung 2026, naduh 6:00 baje janmiet.
Ka sawangka ka dei halor ka khana pateng shaphang ka jingïaleh laitluid naduh mynnor haduh mynta ka ba kynthup ïa ka jingiakhih Jylla Rilum, ka jingïakhih jong ki Dorbar Hima bad ki Syiem pyrshah ïa ka sorkar Bilat bad ka jingiakhun jong u rangbah J J M Nichols Roy ha ka saiñdorbar ïa ka riti synshar ka Ri India lane kata ka Constituent Assembly.
Ïa kane ka sawangka la lamkynto da u Phrangsngi Wahlang bad la thoh da u Bah Raphael Warjri ka ba ïathuh khana shaphang ka jingïaleh laitluid lyngba ki ryta ha ka Ri Khasi naduh mynnor haduh mynta.
Ka sawangka la pynlong ïa ki ktien ba ïakren ki tyngshop puron da ki sur phawar ba kynud katkum ka jingdawa jong ka khep ba sngewsih ne bakmen, ba jarjar ne ba risa kynhoi ban kham snah ka rukom ïaleh ki tyngshop puron.
Ka sawangka ka long da ka rukom ba iathuh khana u kparad ia la ka khun ksiew ha sawdong ka lyngwiar dpei bad ba ki tyngshop puron pat ki sa ia lehkai katkum kata ka khana ba iathuh u tymmen ia la ka khun ksiew.
Ka rukom iathuh khana ka long ka ba myllung bad rhem mynsiem ban sngap bad khmih ki nongpeitkai ka ba lah ban pynkyndeh dohnud ha ba shahshkor ïa ki sur phawar bad ki jingrwai ba tympang.
Ka khana ka sdang da ka jingïaleh ban ioh jylla Rilum bad ka kut da ka khana shaphang u Tirot Sing Syiem bad ka Dorbar Hima Khatsawphra ha ka ba ki khlawait bad ki khyndaibahryntieh ki la iakhun pyrshah ïa ki shipai phareng.