Nongpoh, Jymmang 13: Ban pyndonburom ïaki Nongmihkhmat na Ribhoi District ki ba la shah jied da u paidbah jong ka Ri-Bhoi ha baroh 5 tylli ki constituency haka election MLA ka ba dang shu dep, ki nongialam ka All Meghalaya Karbi Association (AMKA) mynta ka sngi ka la pynkup burom ïa ki MLA ka Ri-Bhoi ki ba la shah pynkup bor da ki paidbah kum ki nongmihkhmat sha ka Ïing Dorbar Thaw-aiñ jong ka jylla naka bynta ban kit ban bah ïaki kam jong ka constituency ha ka jingïalang kaba la long ha Umwang.
Ki MLA kiba la shah pynkup burom ha katei ka sngi ki kynthup ïa u Bah Mayral Born Syiem MLA ka Nongpoh, Dr. C Lyngdoh MLA ka Umsning, Bah C Marngar MLA ka Mawhati bad 2 ngut ki MLA ba kynthup ïa u Bah Sosthenes Sohtun MLA ka Jirang bad u Damanbait Lamare MLA ka Umroi kim shym la poi ha katei ka sngi.
Naka liang ki nongïalam ka AMKA ki la pynkup burom ruh ïa kitei ki MLA da ki jaiñ tynrai jong ki Karbi ryngkat bad ki Momento kum ka dak ka jingshah jingkynmaw halor ka jingjop donburom jong ki ha kane ka elekshon bala dep ha kaba la don ryngkat ruh ha katei ka sngi da ki nongïalam ka AMKA naduh u Bah RR Ronghang President AMKA, Bah Phril Kleiñ Asst. Secretary AMKA, Bah Bistocan Timung General Secretary AMKA, Bah O.Terang Adviser AMKA bad kiwei kiwei ki dkhot jong ka AMKA bad ki paidbah nongshong Shnong.
Ki nongmihkhmat kiba kynthup naduh u Bah Mayralborn Syiem, Bah Charles Marngar bad Dr. Celestine Lyngdoh, haba kren ha katei ka jingïalang ki la pynpaw ïaka jingsngew nguh ïaka AMKA ba ka la kynmaw ban pyn donburom ïaki MLA ban mihkhmat na Ri-Bhoi, namar kane ka jingpynkup burom jong ka AMKA ka pynkynmaw ba ka election ka la kut bad ka la dei ka por ban ïatrei lang da kaba khot ïawer lang ïa baroh ki 5 ngut ki MLA na ki constituency bad ki party bapher bapher ban don kajuh ka thong naka bynta ban shakri ïaki paidbah jong ka dong Ri-Bhoi. Ki la ong ruh ba naka liang jong ki kum ki nong mihkhmat naka them Ribhoi ki la pynpaw ba ki la long kloi ban ai ka jingïatrei lang ha kano kano kapor ba ki paralok Karbi ki donkam khamtam ban wanrah ka suk ka saiñ hapdeng ki paidbah nongshong shnong.
