Shillong, Jymmang 13 : Ka Khasi Students’ Union Laban Circle ,mynta ka sngi Saitjaiñ kala pynlong ka jingkhynra ïa ki dukan bam/sha kiba don ha thaiñ Laban, Lumparing, Lumshatsngi bad K.O.R ban pynthikna ïa ka jinglehkhuid, kaba lah ban ktah ïa ka koit ka khiah ki nongbam bad nongdih sha.
Ka KSU kala shim ïa kane ka sienjam hadien ka jingïohpdiang ïa ki jingujor na ki paidbah ba kiba bun ki dukan ki dei kiba lehsih bad kim phikir satia ban lehkhuid ïa ka bam ka dih ha kaba bun sien ki briew ki ju ïoh pang na kaba bam ïa ki jing bam na kine ki dukan.
Ha kane ka jingkhynra ïa ki 27 tylli ki dukan bam baroh lang, ka KSU kala lap ba bun na kine ki dukan kim don satia ïa ka lisen n aka FSSAI kaba shah ïa ki ban plie bad die ïa ki mar bam bad la lap ruh ba don ki katto katne ki dukan kiba ka jingjaboh ka long kaba ishyrkhei.
Halor kane ka jingshem, ka KSU kala phah khang khyrdep shuwa ïa kine ki dukan kat ba kim pat lah ban pynkhuid kat kum ki kyndon ba la buh da ka FSSAI. Kine ki dukan ki dei ka Appayani Tea Stall ha Laban, Babua Tea Stall ha Lumshatsngi, Dada stall ha Red Cross bad Ruma Das Tea Stall ha Laststop.
Ka Seng ha kine ki sngi kan phah ruh ïa ka kaiphod jong ka jingshem sha u Food Inspector, FSSAI bad u Myntri ba dei peit ba kin leh ïa kaba donkam.
Ka Seng ka kyntu ruh sha baroh ki dukan bam ba kin long kiba leh khuid khnang ba ka nym ktah ïa ka koit ka khiah jong ki paidbah.
