Shillong, Jymmang 13 : U MLA ba thymmai ka Sohïong, Bah Synshar Roy Kupar Lyngdoh Thabah mar ïa dep ban pynbna kum u nongjop ha kane ka elekshon MLA, u la ong ba u kwah ban ai ka khubor kaba shai sha baroh ba kim dei satia ban wan thied ïa ka hok jong ki paidbah da ka pisa.
“Hapoh Sohïong wat ju wan da ka bor pisa thied ïa u paidbah da ka jingieid,” shuh shuh u ong ruh ba kum u MLA ba thymmai um kwah ban shu kut tang ban long MLA hynrei ruh ban long ruh u nongthaw aiñ ha Iing Dorbar Thawaiñ ka jylla.
Ha kajuh ka por u ong ruh ba u kwah ba kum u nongmihkhmat ba thymmai un ïa said lang ïa shibun ki mat kiba ktah ïa ka jylla bad ka Jaidbynriew kum ka Roster, ILP bad ruh ïa ka UCC.
U Bah Synshar uba la pynliem haduh 3422 vote ïa u Bah Samlin Malngiang ba dei u kyrtong ka NPP, u la kubur ruh ba kadei ka bor jingkyrkhu jong u Bah HDR Lyngdoh uba dei u Kni jong u ba u la ïoh ïa katei ka jingjop kaba donburom ryngkat ka jingtrei borbah bad ka jingshaniah jong ki paidbah.
“Ki matti jong i kiba bun ha Sohïong constituency bad ngan shu long u saibteng ïa ki kam jong i kumba nga la ju ong hi ban pynwandur bad pynbhabriew shuh shuh ïa ka Sohïong constituency,” u la ong. Shuh shuh u ong ruh ba ki ngeit ba ka jingjop jong u ha kane ka elekshon kadei ryngkat ryngkat ruh ka vote sngewsynei jong ki paidbah.
Lah ban kdew hangne ba ki don haduh 6 ngut ki kyrtong kiba aireng ha kane ka elekshon ha Sohïong bad na kine, u Bah Synshar u la ïoh haduh 16,679 vote, katba u Bah Samlin jong ka NPP u ïoh 13,257 vote, kyrtong ka Congrss 1762 vote, katba kiwei ki kyrtong kata kyrtong ka HSPDP da 62 vote, TMC da ki 89 vote bad u kyrtong ka BJP da ki 40 vote.
