Shillong, Jymmang, 13: Ka Young Minds ka kynhun ba la seng da ki katto katne ngut ki samla na them Ri-bhoi ha u snem 2017 ban leh ïa ki kam isynei sha ki parabriew khlem da kheiñ ïa kano kano ka jaidbynriew, ha ka sngi Saitjaiñ kane ka kynhun ka la leit ban ai jingïarap da ki marbam mardih sha ki jaidbynriew riewlum kiba la phetwir na ka jylla Manipur sha nongbah Shillong hadien ka la khie ka jingïaumsnam kaba shyrkhei kaba la sdang naduh ka 3 tarik mynta u bnai.
Katkum ka jingpyntip jong ki bor synshar shnong jong ka shnong Madanryting ki phetwir, Hmar, Gangte, Kuki bad kiwei kiwei ki jaidbynriew riewlum ki sah ha ki Relief Camp ba la pynbiang da ki parajait jong ki ha ka shnong Madanryting, Shillong.
Haduh mynta ki phetwir riewlum kiba la wan poi ha Them Basuk, Madaryting ki don haduh 150 ngut eiei.
Dang shen ki nongïalam jong kine ki phetwir kiba la buhai shnong ha kane ka jylla Meghalaya ki la leit ban ïakynduh ïa u Myntri Rangbah ka Jylla u Conrad Kongkal Sangma ban pan jingkyrshan bad ban pan jingïada na ka bynta ki parajait ynda ki la phet na ka Jylla Manipur ban wan sah shipor ha nongbah Shillong. U President ka Young Minds u Bah Isynei Hinge u la kyrpad ïa ki bor sorkar ba kin ai jaka jaka rieh shipor ïa kine ki phetwir bad ban lum kyrteng ïa iwei pa iwei khnang ba ynda ka shongsuk shongsaiñ ka la wan phai kin dup lah ban leit phai biang sha la ka jong ka jylla.
