Nongpoh, Nailur 12: Da ka jingsngew sarong halor ka jinglah jong ka kynhun ïalehkai ka Saiden Secondary School haka kyrdan U-17 ki kynthei ban khur ïaka nam jop haki 2 tylli ki jingïalehkai Subroto Mukherjee Cup haka District bad kumjuh ruh haka State Level, ki bor pynïaid jong ka skul Saiden ha ryngkat ka jingïadonlang ki kmie ki kpa ki khynnah pule bad ki thei ïalehkai phutbol ki la pynlong syndon da ka prokram ba kyrpang ban pyndon burom ïaki thei ïalehkai kiba la lah ban wan rah ïaka nam bad ka burom daka ba khur ïaka jingjop ha kitei artylli ki lympung bad ha kajuh kapor ban kitbok kitwriang ïa kine ki thei ïalehkai ha shwa ba kin mih noh naka jylla ban leit ïashim bynta sha ka lympung National Level Inter School Subroto Mukherjee Cup ka ban sa long ha Nongbah Delhi.
Kane ka kynhun U-17 jong ki kynthei kaba la ïoh ruh ïaka jinghikai kilan met kaba kham janai mynta la kumba katto katne por ha nongbah Shillong kan mih haka 16 tarik, Nailur ban leit ïakhun sha katei ka lympung ha nongbah Delhi. Kane ka kynhun kaba mihkhmat na ka jylla Meghalaya ka la ïoh ban rung haka pool-B kaba kynthup lang ïaka Goa, Uttrakhand bad ka Kendriya Vidyalaya Sangathan, bad ka jingïalehkai kaba nyngkong eh jong ka jylla Meghalaya kan long haka 20 tarik Nailur pyrshah ïaka Goa.
Ki bor pynïaid jong ka Skul Saiden ha ryngkat ki riew rangbah kiba la poi ban ïadon lang ha kane ka sngi ban pynshit pynshngaiñ bad ai mynsiem ïa kitei ki thei ïalehkai ki la ai ka jingkyrkhu kyrdoh ha ryngkat ka kitbok kitwriang ïakine ki 16 ngut ki thei ïakehkai bad ïaki arngut ki Official ba kin don barabor haka met kaba shait kaba khlaiñ khang ba kin lah ban ïalehkai bha ba kin ïoh ruh ban khur ïaka nam jop na katei ka lympung ban wanrah nam bad burom ïaka jylla hi baroh kawei.
Hakane ka sngi la wan ban ïadon bynta lang da u bah Donlang Sohkhlet, Vice-Chairman ka Megalaya Resource Employment Generation Council kum u kongsan, Bah Bobby L Nongbet District Sports Officer, Ri-Bhoi kum u symbud kongsan, bah Ferdinal Khamkamni, President KSU-NKHD, Bah Markus Marten, President, HNYF Northern Region, Bah Sumarlang Swer u Coach, Kong Rida Lyndem Manager jong ka kynhun, Bah E.K Lapang, Rangbah Shnong, Bah L C Nongsiej, Head Master Saiden Secondary School, ki nonghikai skul, ki khynnah skul, ki kmie ki kpa lem bad kiwei kiwei ki riew rangbah.
