Jowai, Risaw 02: Ka Panaliar Khynroo Khyllood Welfare Organisation, Panaliar Jowai, kawei na ki tnat treikaam ka Dorbar Chnong Panaliar, mynta ka sngi kala pyndon burom ïa ka sngi kha u Mahatma Gandhi kum shibynta jong ka Campaign Swachhata Hi Seva, da kaba pynkhuid ïa ka shnong hi baroh kawei.
Kane ka pynkhuid shnong, lasdang naduh Yungwalieh, ha ka jingïadonlang u Waheh Chnong, Shri Riquoma Rq. Laloo ryngkat bad u Careme Phawa, General Secretary ka shnong bad katto katne ngut ki dkhot rangbah ka shnong. Ha shuwa ban sdang ka pynkhuid, ladon ka jingïalang lyngkot ba la pynïaid da u Wombai Sumer balong u President ka PKKWO, la ïoh ïa ka jingkren lyngkot na u Waheh Shnong bad ki kyntien ai khublei na i bah Arwanki L. Laloo, Secretary, PKKWO.
U Waheh Chnong u la ong ba, ka Khuid ka suba kadei kawei kaba donkam tam ha ka jingim briew kumta dei ban lehkhuid ïalade, ka ïing ka sem, ki lynti syngkieñ ban ïoh ïa ka jingkhuid jong ka shnong baroh kawei. U khot ïa ka jingïatreilang jong baroh ki nongshong shnong, ki nongleit nongwan na ka bynta ka khuid ka suba, ha ka juh ka por u kyntu ïa kiwei ba kidei ban tip ba ka shnong kadon ka bor ba hakhliehduh ïa kano kano ka kam hapoh u pud u sam jong ka.
Hadien ba ladep pynkhuid na Yungwalieh, ka kynhun kala leit sha ki bynta wa ker sawdong ïa ka Maternity & Children Hospital, kaba don hapoh u pud u sam ka shnong. Ka jingpynkhuid shongshit ki longkmie bad kiwei pat ki dkhot shynrang, ka la pynlong ban dep kloi ban pynkhuid ïa katei ka jaka. Hangne, ha kapor ba lasdang ban pynkhuid ïa ki bynta ba hakhmat gate ka MCH, la ïamih ruh ki nongtrei jong ka MCH ban ïatrelang. Lawan ïashimbynta naduh u Medical Superintendent Dr Ebenezer War, ka Nursing Superintendent wa kiwei de ki nongtrei jong ki tnat bapher bapher ka hospital.
U Medical Superintendent, ha ka jingkren ka jong u, u la kyntu ïa baroh kiba wan sha ka hospital ba kidei ban tip ba kane kadei ka hospital ka jong ki hi. Ym bit ban leh jakhlia ïa ka, kidei ban lehkhuid namar na kane hi ka wanrah ïa ki bunjait ki jingpang lada ngimtip ban husiar. Ula ai khublei ruh ïa ka shnong Panaliar baroh kawei ïa ka jingkloi jong ka, ban ïatreilang ha kino kino ki kam ba ka hospital ka donkam.
Ka shnong Panaliar, ka labuh ka jing maham kaba jur, ïa kino kino kiba pynjakhlia ïa ki talawiar jong ka MCH bad ruh ïa kino kino kiba noh jakhlia shapoh u pud u sam ka shnong. Lada lap ïa kine, ka shnong kan pynshitom bad ka kuna ka baheh.
