Da ka jingthoh aiti ka JSM Lapangap ha u Symbud Myntri Rangbah halor ki jingeh ha Lum pynthor

Jowai, Nailar 09 : Ka Jaiñtia Students’ Movement (JSM) Lapangap-Unit ha ryngkat ki Rangbah Dong jong ka shnong Lapangap WJHD, mynta ka sngi saitjaiñ 8 tarik u Nailar kila leit ban aiti da ka jingthoh ha u Symbud Myntri Rangbah ka jylla u ma Sniawbhalang Dhar bad dawa naka sorkar halor ki jingeh kiba mih na ka jingwan rep jong ki Karbi ha Lum Pynthor Lapangap.
Kumba long mynta kila pynsngew ba ki nongrep na ka shnong Lapangap kim ïoh lad shuh ban leit shna ïa ki ïing trep jong ki ha katei ka jaka ban leit ot ïa u kba namar ka jingdon ki briew jong ka Karbi bad ki pulit Assam.
Haka jingïakren jong ki bad u Symbud Myntri Rangbah ula pyntikna ban pynlong ka jingïakren pynbeit ïa kane bad ka Assam, kila pynsngew ba ka Dorbar Shnong Lapangap ka khlem ai rai satia ïa ki briew ka Assam ban leit rep ha katei ka jaka kaba dang hap hapoh ka shnong Lapangap jong ka jylla Meghalaya halor kane kila dawa ban pynsangeh mardor ïa katei ka kam rep beaiñ.
Sa kawei ka jingdawa na u Symbud Myntri Rangbah ka long ban pynkynriah noh mardor ïa ka Police Camp kaba don hapoh ka shnong Lapangap bad buh noh shajan Lum Pynthor, khnang ban shngaiñ ki nongrep kiba leit rep sha katei ka jaka, halor kane u Symbud ula kular ban ïakren ïa kane.
Ha kaba ïadei bad ka jingtei beaiñ ïa ka Permanent Outpost da ka Assam ha katei ka jaka Lum Pynthor, kaba la pynmih ka jingpyrshah jur da ki nongshong shnong ka Lapangap bad ki dkhot ka JSM Lapangap Unit bad la dawa dawa pyndam noh ïa ka.
Ha kaba ïadei bad jingpynbeit ïa u pud u sam hapdeng ki ar jylla, ka seng kala dawa na u Symbud Myntri ban pynkloi katba lah ïa kane ka kam, khnang ban lait na ka jingmih ïakhajia ha ki por ban wan, ha kaba u Myntri ula kular ban leh ïa kaba donkam katba lah.
Ka JSM Lapangap Unit bad ki nongshong shnong kila kren shai lada jia ba ka sorkar kam shimkhia wat hadien bala dep ujor, kila pynbna hadien bala dep ot ïa u kba kin sa khim ïa ki lad jingïakhih kiba tyngeh.