Kam don jingktah ka projek Ropeway ha Lum Shyllong ïa ki tyllong um: Kong RM Kurbah

Shillong, Nailar 09 : Ka Sorkar Meghalaya ka la pynshai ba ka Shillong Ropeway project kan ym don jingktah satia ïa ki tyllong um ha ka jingpyntreikam ïa kane ka projek.
Haba pynshai ïa kane hadien ka jingïalang bad ki paidbah kynthup ïa ki nongïalam shnong jong ka Riat Laban Dorbar Pyllun ha ka sngi Saitjain, ka Joint Secretary jong ka tnad Tourism, Kong RM Kurbah ka la ong ba ki tyllong um kumba la pynpaw d aki paidbah kham shakhmat jong ka Lawsohtun, bad ruh shadien jong ka ka Nepali School. Kumta ka la ong ba bad kam don jingïadei bad ka bynta kaba palat 800 metre jong ka projek ropeway.
Shuh shuh ka la ong ruh ba ym don satia ki tyllong um ha kane ka bynta jong ka project.
Kane ka jingpynshai ka la wan hadien ka jingjurip lang ïa ka jaka da ka PHE, Forest Department, Shillong Municipal Board bad Raid Laban Dorbar Pyllun ïa kitei ki jaka ba don marjan bad ka projek ropeway.
Shuh shuh ka la ïathuh ruh ba ïa ka Detailed Project Report (DPR) jong ka project la pynkylla hadien ba la mih ki jingkhuslai halor ka jingpom bun ki dieng. Ka la ïathuh ruh ba ïa ka jingjrong jong ka laiñ kaba la thmu mynshwa ka long 25 metre, hynrei mynta la kyntiew ïa ka sha kumba 40 metre.
“Ka jingpom dieng ha kane ka bynta kan long tang ha ki 6 tylli ki tower station, kiba don ka jingheh kaba 12×12 metre,” la ïathuh shuh shuh ka Kong Kurbah.
Ka la pynshai bad ki 544 tylli ki dieng la pom tang ha ki jaka ban tei ïa ki tower, katba 5,044 tylli ki dieng la thung ha ki jaka sorkar kum ka shi bynta ban thung bujli pat da kiwei haduh 10 shah kumba la kdew ba man uwei pa uwei u dieng ba pom dei ban thung bujli pat sa 10 tylli ha jaka jong u.
Haba kren halor ka jingud ïa ka jingshah ktah ka mariang, ka Kong Kurbah ka la ong ba ka project kan ym ktah ïa ka um ne ïa ka mariang. Ka la ong ruh Ka la ong ruh ba ka project kan pynitynnad shuh ïa ka jaka bad ka dei kawei na ki project kiba kongsan ïa ka jylla.
Ha kajuh ka por u Project Head jong ka KEC-TCL, u J.P. Singh, u la ong ba ka company kan bud pyrkhing bha ïa baroh ki kyndon kiba ïadei bad ka mariang ha kane ka jingpyntreikam ïa ka projek.
U la ong ba ka jingkit ïa ki tiar sha ka jaka trei ka dei kawei na ki jingeh ha ka jingtei ïa ka ropeway, hynrei ka company kan pynthikna ba ym don jingktah ïa ka mariang bad ki sawdong sawkun jong ka jaka.