Kat haduh mynta mynne ym pat don jaka ban leh ‘Dialysis’ ha Nongstoiñ , shem jynjar ki longïing ba duk

Nongstoiñ, Nailar 09: Ka sor Nongstoiñ ka Head Quarter jong ka West Khasi Hills District, kawei na ki sor kaba la heh bha kaba dei ruh kawei na ki District kaba lah rim tam.Hynrei, kat haduh mynta mynne ha kane ka sor ki dang don shibun ki jingduna ha ki kam pynroi khamtam eh haba ïadei bad ki kam jong ka koit ka khiah.
Shibun kiei kiei kiba ki paidbah ki donkam ym pat don satia, khamtam ha ka jingïadei bad ka koit ka khiah jong kiba bun balang, namar haduh mynta lada ki donkam ban phah sumar jingpang ki hap ban ïabeh ban leit shaduh sor Shillong.
Ki katto katne ki jingeh kaba ki paid nongshong shnong kane ka thaiñ Nongstoiñ ki ïakynduh shaphang ka koit ka khiah, ki kynthup naduh ïa kiba pang Khmat, pang Khyllai bad kiwei kiwei bad haduh mynta mynne wat tang ka kamra Inter Care Unit ne (ICU) ruh ym pat don satia.
Haba ïadei bad ka ka jingpang Khyllai kaba la kynrei bha ha kine ki sngi, u nongthoh khubor haba pyrshang ban lum jingtip kylleng ki jaka ha ka thaiñ, la lap ba ki don shibun bah kiba pang Khyllai kiba hap ban leit phah leh ïa ka Dialysis shaduh sor Shillong.Ka daw hi ka long namar kat haduh mynta mynne, ka sor Nongstoiñ kam pat don satia wat tang kawei ruh ka jaka sumar kaba lah ban shakri ïa ki paidbah ha kaba ïadei bad kane ka jingpang.
Kawei ka kong ba 37 snem ka karta kaba na ka thain Umthli, thaiñ Maweit bad ka samla ba 23 snem ka karta kaba na ka thain Rambrai, ki la ïathuh ba ki la mad ïa ka jingeh kaba khraw haba ngat ha kum kane ka jait jingpang. Namar ki hap ban leit phah leh Dialysis shaduh sha Mairang la bun bun snem mynta.
Ka jingeh ka dei namar ki wan na ki longïing kiba duna ha ka ïoh ka kot, kumta ki shem shitom ban pynbit pynbiang ha ka leit ka wan bad ha ka bai dawai namar ka Smart card ruh kam treikam ha baroh ki liang.
Ka kong kaba dei na ka thain Maweit ka la ïathuh ba ka hap ban wan sahmiet shuwa ha sor Nongstoiñ, da kaba shu kyrpad ïa ki lok ki jor ba kin ai basa shimiet, khnang ba kan lah ban poi ha ka por kaba biang sha Mairang, na ka bynta ban leit leh Dialysis nalor ba hap ban leit haduh laisien ha ka shitaïew.
Ka samla ka dei ka bym don kmie don kpa bad la shu kyrshan ïa da ki hymmen ki para.Kane ka samla ka la ong ba mynshuwa lei lei haba ki hap ban leit shaduh sor Shillong haduh lai sien shi taïew, katno ki sangsot hynrei haba la ïoh ban phah sumar ha Mairang ka la kham pynsting khyndiat.Pynban namar ba lah bun palat kiba na ka thaiñ ka West Khasi Hills kiba la tuid lut sha Mairang, mynta ka kynti ym ngiam shuh bad ym don jaka shuh wat ha Mairang.
Kane ka samla ka la pynpaw ruh ka jingdiaw mynsiem bad buh ruh u dak jingkylli, ba kumno kat ka sor Nongstoiñ haduh mynta kam pat don ka jaka leh Dialysis, haba wat ka Mairang kaba dei tang ka khun pynban lah don bad la kham biang ki lad jingsumar.
Shuh shuh, u nongthoh khubor u la ïakynduh bad ïoh ïakren ruh bad kawei ka longïing jong ka thaiñ Nongstoiñ kaba mad ïa kum katei ka jingpang, kaba na kajuh na katei ka ïing ki la don haduh lai ngut kiba la pang khyllai. Ar ngut ki khun ki la khlad noh bad kawei pat ka khun samla jong ki mynta ka dang don ha ka jingphah sumar ha kaba ka hap ban leit phah leh Dialysis haduh ar sien shitaïew.
Kane ka samla ka ba 22 snem ka karta.La ong ba katei ka samla ka dei ruh kaba lah pule haduh B.A, hynrei ki jingangnud jong ki la pulom noh namar ka jingwan ban ka jingshitom.Nalorkata u kpa jong ka ruh um lah shuh ban trei ban ktah, namar ma u ruh u don ïa ka jingpang jingshitom kaba la tip kum ka Prostrate ha kaba um lah shuh ban trei khia.