Ai U MDC ka Umroi da ka ‘Public Toilet’ ban wan rah ïa ka khuid ka suba ha shnong Nongthymmai

Nongpoh, Risaw 02: Kum shi bynta ba rakhe ïa ka lyngkhuh sngi kha ba 154 u Kpa ka jaid bynriew, u Mahatma Gandhi bad ruh ban wan rah ïa ka khuid ka suba hapoh k shnong ka thaw, Ka shnong Nongthymmai ba hap hapoh ka Raid Madan Kyrdem, Ri Bhoi District mynta ka sngi ka lah ban plie paidbah noh ïa kawei ka Public Toilet bad ha kajuh mynta ka sngi ka la pynlong ruh ïaka jingïapynkhuid shnong paidbah na ka bynta ban wan rah ïa ka khuid ka suba hapoh ka shnong ka thaw.
Ïa katei ka Public Toilet la tei lyngba ka MDC scheme ha ka jinglut kaba la kot sha ka T. 3 lak tyngka bad la wan ruh ban plie paidbah da u MDC ka Umroi, U Bah R.R Kharbuki kum u kongsan.
La sakhi lang ruh ha kane ka sngi da ka jingdonlang u Rangbah Shnong, u Bah Pherlus Mawroh, u Bah Stephan Shadap, u Bah R Lynshing, u Bah Bhalad Mukhim bad kynthup kiwei kiwei ki riew rangbah bad ki paidbah nongshong shnong ka shnong Nongthymmai kiba la mih paidbah ban ïa shim bynta ha ka jingïapynkhuid ïa ka shnong ka thaw ha ki bynta bapher bapher jong ka shnong.
Haba ai jingkren ha kane ka sngi kum u kongsan, u MDC ka Umroi Constituency, u Bah R. R Kharbuki u la pynpaw ïa ka jingkmen kaba khraw ban ioh ban ïa shim bynta na ka bynta ban plie paidbah noh ïa kane ka Public Toilet bad kaba dei ruh ka sngi kaba ïa tyngkhu ïa ka jingrakhe burom ïa la lyngkhuh sngi kha ba 154 snem u Mahatma Gandhi kum u nongïalam ba khraw ka ri uba la pynioh ïa ka jinglaitluid ïa ka ri na ka jingsynshar donbor ki phareng.
U la ong ruh ba u sngewkmen ruh ba ka Dorbar Shnong lyngba ka Executive Committee ka la pyntreikam hok ïa kane ka scheme ban shna ïa ka Public Toilet, namar ka shnong Nongthymmai kum kawei ka shnong ba long pdeng ka donkam ïa ka Painkhana paidbah khamtam ba ki paidbah ka Raid Madan Kyrdem ki wan ban thied ban pet ha kane ka shnong ba don ka iew pdeng ïa ki paidbah.
U la kyntu ruh ïa ki paidbah nongshong shnong ba kin dang dei ban ban pynneh ïa ka mynsiem jong ka jingïatrei lang ban wan rah ïa ka khuid ka suba bad khamatam ban pyndonkam hok ïa katei ka painkhana kaba long ka jingdonkam na ka bynta ka khuid ka suba hapoh ka shnong ka thaw.
Shuh shuh, u la kyntu ruh ïa ki paidbah ba kim dei ban don tang kata ka jingkitkhlieh halor ka khuid ka suba hapoh ka shnong ka thaw, hynrei kum ki nongshong shnong ki dei ruh ban ai ka jingïatrei lang ha baroh ki liang khamtam ki kam pynroi ha kaba lada don lang kata ka jingïatrei lang na baroh ki liang ki kam pynroi kin wan ha kane ka shnong ka ban long ka jingmyntoi na ka bynta ka lawei jong ki khun ki kti bad ka pateng jong ka shnong ka thaw, u la bynrap.