Da ka jingïaid paidbah pyrshah FCRA, shah pynrem jur u Myntri Rangbahduh ka ri bad u Amit Shah

Shillong, Nailar 10: Ki nongïalam jong ka seng Meghalaya Pradesh Congress Committee (MPCC) hapoh ka jingïalam jong u President u Bah Vincent H Pala uba dei ruh u MP ka Lok Sabha barim na Shillong Parliamentary Seat, ha ka sngi Nyngkong ki la pynlong ïa ka jingïaid paidbah kaba jar jar ban pyrshah ïa ka jingwanrah jingpynkylla jong ka sorkar NDA hapoh ka jingïalam jong ka seng BJP ïa ka Foreign Contribution Regulation Act ha kine ki 3 sngi jong ka jingpynlong ïa ka Ïingdorbar Thaw Aiñ jong ka ri.
Kane ka jingïaid paidbah ka la sdang na Madan Ïew Rynghep bad kaba la pynkut pat hapoh Don Bosco Square Latumkhrah. Ha kane ka jingïaid kaba la shim bynta tang da ki nongkitkam na ki distrik bad kumjuh ruh ki dkhot bad ki katto katne ki paidbah kiba wan ai jingkyrshan, ki la pyrta ha lynti ban pynrem ïa ka jingleh donbor jong ka BJP ïa ki rit paid, nangta ban pyrta pynrem ïa u Myntri Rangbahduh ka ri u Narendra Modi bad kumjuh ruh ïa u Myntri ka tnat Kam Pohïing ka sorkar pdeng u Amit Shah halor ka jingwanrah ïa kane ka FCRA Bill 2026 hapoh ka Parliament kaba dang ïaid mynta.
Ha kane ka jingïaid paidbah ki la rah da ki jingthoh placard kiba ong ba dei ban ïada ïa ki jaka pule, ïa ki hok bad ïa ka lawei ka ri, nangta em ïa ka jingbym hok, wat shimnoh ïa kaei kaba ai jingshakri ïa ki paidbah, nangta na ka bynta jong baroh ki khynnah, jong baroh kiba pang, jong baroh ki longïing dei ban ïada, ki la thoh ruh ba ka NDA ka dei kaba matlah bad kaba tlot haba la pynmong ïa ki hok balei kim kren, kyntait ïa ka aiñ FCRA naba ka pynjot ïa ki tnat shakri paidbah bad kiwei kiwei ki jingthoh.