Ka NPP ka dei ka BJP, yn pyrshah beit ka Congress ïa ka FCRA naba ka ïuhroit ïa kynhun rit paid: Pala

Shillong, Nailar 10: U President ka Meghalaya Pradesh Congress committee bad ki nongkyrshan jong ka ki la ong ba kin ïakhun beit ban pyrshah ïa ka Foreign Contribution Regulation Ammendment Bill 2026 ba la wanrah da ka Sorkar Pdeng hapoh ka jingïalam jong ka BJP la ka long ba kin hap mih sha surok, ban iakhun ha ka ïingbishar ne ban ïakhun hapoh ïingdorbar thaw aiñ jong ka ri.
Ïa kane u President ka MPCC u Bah Vincent H Pala u la kren hadien ba la dep ka jingïaid paidbah kaba jai jai jong ka seng kaba la sdang na madan Fire Brigade shaduh Don Bosco Square, Laitumkhrah ha ka sngi Nyngkong.
U Bah Pala u la ong ruh ba ka FCRA kadei ka jingthmu jong ka BJP ban lute ïa ki jingdon jingem jong ki kynhun niam, ki Balang bad kumjuh ruh jong ki sengbhalang kiba ïoh ki jingkyrshan pisa na shabar ri ban leh ïa ki kam isynei, ki kam shakri ïa ki duk ki rangli, ki khunswet bad kiwei kiwei.
U la ong ba hapoh ka clause kaba 16 ka sorkar NDA hapoh ka jingïalam ka BJP kan sa knieh lut ïa baroh ki jingdon jingem lada ym lah ban pyndep ïa ki kyndon ba ka la buh.
Ha kajuh ka por u Bah Vincent u la ïathuh ruh ba ka jingbym lah ban donlang ki nongïalam Balang ha ka jingïaid rally ka dei ba ki shah byrngem ha ka BJP.
Halor ka Sorkar MDA hapoh ka jingïalam ka NPP ha ka jylla, u Bah Pala u la ong ba ka MDA kan ym lah ban leh eiei namar ki donlang bad ka BJP bad kynnoh ruh ba ka NPP kadei hi ruh ka BJP.
U la ïathuh ba ka Congress kan pynlong ïa kine ki jingïaid rally sha manla ki district bad Wat ha baroh kawei ka ri India.
Haba kylli shaphang ki jingduna kiba wan shim bynta u President ka MPCC u la ong ba la khot tang ïa ki nongïalam ba hakhmat ka seng ban shim bynta hynrei kiwei ki wan da ka mon sngewbha.
Haba kren shaphang ka jingïaid rally ka Voice of the people’s party (VPP) u Bah Pala u la ong ba jingïaid paidbah jong ki dei shaphang ka saiñ pyrthei pyrshah ïa ka sorkar MDA katba ka rally ka Congress ka dei ïa baroh Salonsar, khamtam ki rit paid bad ki duk ki suk bad na ka liang ka Congress kan ïai don beit bad kiba shah ban beiñ, ki samla ba mad jingkyrduh kam bad khamtam eh ban ïakhun ïa ka jinghiar ka ïoh ka kot bad ka jingsdang ka jingkyrduh hapoh ka jingsynshar ka BJP.