Jowai, Rymphang 02: Ki bor pynïaid District jong ka West Jaiñtia Hills kum shi bynta ban rakhe ïaka sngi International Water Conclave- 2024 mynta ka sngi Thohdieng kila pynlong ïa ka jingpynkhuid (Cleaning Drive) ïaki bynta jong ka Wah Myntdu kaba la sdang naduh Jingkieng Pamblah surok (Jowai-Shillong) ter ter shaduh ki bynta jong ka Treïongriang (Ban Ser).
La sdang ïa kane ka jingpynkhuid naduh ka por 9 baje mynstep haduh ka 1 baje janmiet, ha kaba la wan ban ïashim bynta da ki ophisar, ki nongtrei jong ki tnad sorkar bapher bapher bad ki khynnah Scouts & Guides.
Ïa kane ka kynhun yn lam khmat da u bah W.K. Kharlukhi, MCS, Assistant Commissioner, Jowai haka jingsynran lang u ma Iaidbha Phawa, Assistant Research Officer bad u ma K. Ryngkhlem Research Assistant na ka tnat District Planning ryngkat ki nongtrei jong ka ophis u Deputy Commissioner, West Jaiñtia Hills District.
Kane ka jingpynkhuid ïaki bynta ka Wah Myntdu ka long ruh kum ka lad ban wanrah ïa ka jingkhuid jingsuba kiba la dap satang ki jaboh jabaiñ ha shi lynter ka Wah bad kiba la pynsniew dur ïa ka Wah Myntdu kaba long ka nongbsa umbam ïaka sor Jowai.
Ka jingpynkhuid ia kane ka Wah kan long ruh ka nuksa ia ki nongshong shnong ban ri bad ban sumar ia kane wah kaba long ka tyllong um jong ki shnong kiba don ha rilum Jaiñtia.
