Nongstoiñ, Rymphang 2: Na ka bynta ban wanrah ïa ka jinglong kawei, ka jingïasngew jan hapdeng ki samla jong ka thaiñ muliang baroh kawei, ka Seng Samla Shnong Tynghor ha ka janmiet jong ka sngi palei ba la dep, ka la pynlong ïa ka Konsat ha ka madan ïalehkai jong katei ka shnong, ha kaba da ki spah ngut ki paitbah nong shong shnong na katei ka thaiñ ki la ïatuid ban leit sha katei ka jaka.
Ha katei ka janmiet ka Kids Tarari na Nongstoiñ ka kynhun rwai kaba la paw nam bha hapoh ka District bad ka jylla, ki la pynlung mynsiem bad pynkyndeh ïa ki paitbah nongpeit da ki jingrwai bad ki ryndang ba syiang jong ki. Nalor kata ka Seng Samla Shnong ka la khot ruh ïa u nongrwai D.J.Wanshan na Jowai u nongrwai ba la paw nam bha hapoh ka jylla, ha kaba ka la pynshongshit ha kaba wat ki tymmen ki kro ki la hap ban pynhkih met haba u rwai.
Ha katei ka janmiet u bah R.G.Momin MLA ka Rambrai Jyrngam u la long u kongsan bad u bah Robertjune Kharjahrin president barim ka HYC bad u bah Elyon Dkhar ki la shah khot kum ki symbud kongsan.
U bah R.G Momin haba ai jingkren kum u kongsan, u la ong ba ka jingpynlong jong ka Seng Samla Shnong ïa katei ka concert ka dei ka lad bad ka kabu ïa ki khynnah bad ki samla jong ka thaiñ kiba don sap ha ka rwai ka siaw ka put ka tem ba kin shim nuksa na kitei ki nongshah khot sngewbha.
U la ong ruh ba baroh ki khynnah bad ki samla ki don la ka jong ka jong ka sap kaba kyrpang kaba u Blei u la ai ha ki, la ka long ha ka rwai ka siaw ka tem ka put bad kiwei kiwei. Hynrei lada ym don ba pynshlur ïa ki bad kiba pyni nuksa ki don kiba leh rain ban pynpaw pyrthei.
U bah Robertjune Kharjahrin u la ong ba ki samla kiba don ïa ki sap bapher bapher ki dei ban pyndonkam hok ïa ka sap ba ki don. U la ong ba ka jingpynlong ïa katei ka concert ka dei ban long ruh kum ka jinghikai ïa ki khynnah samla, ba kin kiar na ki jingmlien ba sniew, namar ha kine ki bun bah ki samla ki la shah pynngop ha ki jingmlien ba sniew. Hynrei, lada ki samla kiba don ïa ki sap ba kyrpang ki pyndonkam hok, kin lait na ki jingshah pynngop ha ki jingmlien ba sniew.
