Shillong, Ïaïong 19 : U Myntri Rangbah ka Jylla u Conrad K Sangma u la ong ba ka Sorkar ka la pynkhreh mynta ban wad madan ïalehkai ha ki jaka nongkyndong ban siang phlang plastik. Ïa kane u Myntri Rangbah u la ong ha ka sngi Balang ha ka jingleit jurip ïa ka jingïaid shaphrang jong ki jingtei ban maramot ïa ka madan First Ground, ka JN Complex bad ka Indoor Stadium kiba don ha Polo.
“Ban nang kyntiew ïa ki jingïalehkai, ka Sorkar Jylla ka la ïaid shakhmat ban wad ïa ki madan ïalehkai ha ki jaka nongkyndong ban siang phlang plastik katba ha ki jaka khap sor la dep ban peit bniah lut,” ong u Myntri Rangbah.
U Myntri Rangbah u la pyntip ruh ba ka jingmaramot ïa ka madan First Ground ka la ïaid shakhmat bad la khmih lynti ban pyndep noh ïa ka ha u Naitung mynta u snem. “Kumba ngi la sakhi ba ïa kane ka madan First Ground la dep ban siang ïa u phlang bad ka jingmaramot sawdong jong ka ka la ïaid shakhmat bad ngi khmih lynti ban pyndep noh ïa kane ka madan ha u Naitung mynta u snem,” la ong u Myntri Rangbah.
“Kyrmen ba kane ka madan kan dep kloi ha ka por kaba biang khnang ba ngin ïoh ban pynïalehkai noh ha ha u Nailar lane Nailur mynta u snem,” u la bynrap.
U Myntri Rangbah u la ong ruh ba ka jingkiew jong ka jingïalehkai phutbol ka shong ha ki jingbiang ki jaka ïalehkai kumta u kyrmen skhem ba da ka thong ba ka sorkar ka pynkhreh ban wad ki madan ïalehkai ha ki jaka nongkyndong ban siang phlang plastik kan ïarap ïa ki samla ba kin ïoh ban kilan met bad ban pynpaw pyrthei ïa ka sap ïalehkai ba ki don.
Ha kaba ïadei bad ka jingtei ïa ka madan JN Stadium u Myntri Rangbah u la ong ba ïa kane ka madan yn thung da u phlang shisha (Natural turf). “Lada kane ka madan kan sa dep pura kan sa long kawei ka madan kaban ïaryngkat kyrdan bad kiwei ki madan ha ka ri bad kumjuh ruh ha ka pyrthei bad lah ruh ban pynlong ïa ki lympung ïalehkai international bad national ruh kumjuh,” ong u Conrad.
U Myntri Rangbah u la ïathuh ruh ba ïa kane ka madan yn sa pyndep noh ha kaba kut jong u Naiwieng lane ha ka taïew ba nyngkong jong u Nohprah mynta u snem.
Ha kane ka sngi u la leit ruh ban jurip ïa ka Indoor Stadium ha kaba u la sakhi ruh ïa ka jingtrei kaba dang ïaid shakhmat. “Kane ka Indoor Stadium kan dei ka Multi Purpose Indoor Stadium kaba heh duh ha ka thaiñ shatei lam mihngi ka ri India bad lah ruh ban pynlong ki jingïalehkai ha kiba bun bynta kum ka Badminton, Squash, Volleyball, Table Tennis nalor kiwei kiwei,” ong u Myntri Rangbah.
