Pynjlan ka sorkar haduh 15 tarik u Jymmang ïa ki skul pynïaid shnong ban aiti ïa ki NOC

Shillong, Ïaïong 21: Ka Sorkar jylla ka la pynjlan ïa ka jingai por haduh ka 15 tarik u Jymmang na ka bynta ki skul ba la pynïaid da ki bor shnong ne ki community managed SSA schools ban submit ne aiti ïa ki no-objection certificates (NOC) na ka bynta ban aiti ïa kine ki skul sha ka tnat pule puthi.
Ïa kane ka rai la shim ha ka jingïalang ba la pynïaid da u Commissioner & Secretary Vijay Kumar Mantri da ki District School Education Officers (DSEOs), Sub Divisional Education Officers (SDSEOs) bad laitylli ki teachers associations – ka Meghalaya SSA Schools Association (MSSASA), All Meghalaya SSA School Teachers Association (AMSSASTA) bad Meghalaya Fourth Teachers Association (MFTA) – kaba la long ha ka sngi nyngkong.
Haba kren sha ki lad pathai khubor u Director School Education Literacy u Bah Banteilang J Kharshandi u la ong, “Haba sdang ngi la buh ïa ka por, hynrei mynta ka sngi ngi la pynjlan haduh ka 15 tarik u Jymmang. Kane ka long namar la ïohi ba bun na ki skul pynïaid ki shnong ki dang don bun ki jingkylli bad bun ki dang don ki jingartatien.”
U la ong ba ki la don bun ruh kiwei pat ki SSA school kiba la pynïaid da ki kynhun niam bad ki riew shimet.
“Kumba ka long mynta ka format ba la pynwandur da ka tnat pule puthi ka dang long tang na ka bynta ki skul ba pyniaid da ki bor shnong. U commissioner and secretary u la pyntip ruh ba na ka bynta kiwei pat ki skul ba la pynïaid da ki niam bad ki skul shimet ki don, ki hap ban ai ka letter of consent (LoT) ha ka jingthoh kaba mut ba kan ym long ha ka standard format kumba la pynkhreh kaba dei na ka bynta ki skul shnong,” ong u Bah Kharshandi.
U Director u la pyntip ruh ba ha ka jingïalang la ïakren ruh halor ka mat rationalization ïa ki skul. U la ong ba ka seng ki nonghikai ki la pynpaw ka jingsngewkhia shaphang ki skul ki bym don nonghikai ne ki don bun ki khynnah skul hynrei duna ki nonghikai.
“Ngi la ïakren ïa kane kam kham slem ngi sngewthuh ba ka mat Rationalization ka long kaba kyllaiñ hynrei ngi la bthah ïa baroh ki SDSEO bad DSEO ba kin peit ïa kane ka kam baroh kawei. Kumta kaei kaba ngi leh mynta ka long ba ngi peit kum ka nuksa, ki skul sorkar, ka rationalisation ban pynkynriah ïa ki nonghikai kum ka nuksa, lada ngi don arngut ki nonghikai ha ki skul kiba don tang 15 ne 20 ngut ki khynnah skul kumta uwei u nonghikai hap ban kynriah noh sha kawei pat ka skul,” u la batai.
Ha kajuh ka por u Director u la pyntip ba ka sorkar ka dang don ha ka kam ban pynbeit ïa kane ka jingeh halor ka jingdon bun ki category jong ki skul.
Katkum ka jingong jong u, ka sorkar hadien ba la shim ïa baroh ki jingshaniah bad hadien ba la shim ïa ka rai lyngba ki NOC kan shim ïa ka rai kaba khatduh ban ïaid shakhmat ïa kane ka kam.