Shillong, Ïaïong 21: Ka Confederation of Meghalaya Social Organisation (CoMSO) ha ka sngi Nyngkong ka la dawa ban pynsangeh shuwa shipor ïa ka jingthungkam ïa ka Esther Ngurlienmoi Marak, kaba la shah jied na ka bhah Scheduled Tribe ki Garo ha ka eksam Meghalaya Civil Services (MCS), tad haduh ban da dep pynshisha bha ba ka dei hok ka Garo ne kam dei.
Halor kane ha ka kyrwoh khubor, ka CoMSO ka la dawa ruh ban thung ïa ka State-level Independent Enquiry Committee, kaba kynthup ïa ki Nokma ba ki Nongïalam ki Mahari, ki nongmihkhmat na ka Autonomous District Council (ADC), ki scholar ba tip bniah ïa ki riti dustur ki riewlum, bad ka Tnad Tribal Affairs ka Jylla, ba kan shong bishar ïa kane bad ïa kiwei kiwei ki case kiba ïasyriem bad kane ka kam.
Na ka liang ka Confederation ka la kynnoh ba ka Estheer Marak ka la shah jied wat hapdeng ka jingbym lah bha ban pynthikna ba ka hiar pateng na ka kmie Garo, kaba ithuh da ka Mahari kaba dei ka Kur, lane ba lah ban pynshisha ïa ka tynrai Garo kumba ka ju dei ka rukom.
Ka Confederation ka la kam ruh ba lyngba ka RTI na ka Ophis ka Deputy Commissioner, East Khasi Hills (vide Letter No. P.15/1/26/09/Vol-I/82, tarik 20th Lber 2025), la pynthikna ba ym shym lap satia ïa ki kot ki sla ba la ai Scheduled Tribe Certificate ïa ka Esther Ngurlienmoi Marak.
“Kane ka jingbym biang ki kot ki sla ka la pynmih ïa ka jingkylli halor ka jingpynïaid kam kaba shai, ka bynta jong ka jingbishar ïa ki kot ki sla da ki bor khmih, bad lehse ka jingleh bym hok ha ka jingai syrnot bad thungkam. Ka CoMSO ka kheiñ ïa kane ym tang ka jingpynkheiñ ïa ka jingshaniah hynrei ka jingpynkheiñ ïa ka jingngeit ba la ai da ki paidbah ha ki Tnad treikam ka Sorkar ka Jylla Meghalaya. Lada ïa ka jingithuh ki riewlum la shu thok la ailad khlem da tynjuh, ka lawei jong ka Reservation Policy, ka jingshaniah u paidbah, bad ka synshar khadar na la tynrai ka don hapdeng ka jingma kaba khraw bha,” bynrap ka CoMSO.
Na ka liang ka CoMSO ka la dawa ruh ban pynthikna ïa ka syrnot riewlum kaba mih dak jingkylli, kynthup ban pynshai paidbah ba kumno la ai ïa ka syrnot, mano ba aibor ïa ka bad balei ba jah ki kot ki sla.
“Ngi dawa ïa ka jingpynbah khlieh bad leh eiei da ka Tnad pyrshah ïa ki Ophisar kiba donkti ha kane ka kam ai syrnot kaba beaiñ, la ka dei kaba leh da ka jingtorti lane ba leh khnang,” bynrap ka Confederation.
Ka la ong, “Ka dei ban don ka jingbishar bad audit ïa ki tribal certificate ha baroh kawei ka Jylla, kiba la dep ai naduh ki phew snem ba la leit ïa ki nongtrei Sorkar, ka jingpynrung klas ha ki jaka pule bad kiwei kiwei ki jingmyntoi bala ai na ka bhah ki ST, haba buhkhmat ïa ka jingpynshisha ryngkat bad ki bor khmih na ki Kur bad ki Shnong ki thaw.”
Ka CoMSO ka la maham ba lada ka Sorkar Meghalaya kam leh eiei ïa kane ka kam hapoh ka por kaba dei, ka CoMSO ka don ïa ka hok ban shim ïa ki lynti ban pynbeit katkum ka riti synshar, kynthup ka jingmudui mukotduma bad ki jingïakhih ba jai jai, ban ïada ïa ka hok ki trai ri trai muluk bad ka burom jong ka Jaidbynriew bad ka jylla hi baroh kawei.
