Shillong, Ïaïong 21: Ka Hynñiewtrep Youth Council (HYC) ha ka sngi Nyngkong, ka la ïoh bat ïa 4 ngut ki nong Assam na ka shnong Shella, East Khasi Hills kaba don ha khappud ka Ri Bangladesh bad ka la dawa na ka Sorkar Jylla ba kan tuklar halor ka jingjur ka jingwan buhai shnong beaiñ kiba nabar jylla sha kane ka Jylla.
Haba pyntip ïa kane u president ka HYC u Bah Roykupar Synrem u la ong, “Mynta ka sngi ha ka por kumba 8 baje mynstep ki dkhot ka HYC Shella unit ki la ïoh bat ïa 4 ngut ki nong Assam bad ha kaba nyngkong la suba ba ki dei ki nong Bangladeshi kiba wan na Dalia kaba don hajan ka jingker sainar ha khappud bad ka Ri Bangladesh kiba wanpoi hynnin ka miet bad ha ka jingtohkit kila ong ba ki thmu ban leit sha Shillong. Kine ki briew ki don EPIC, Aadhaar bad PAN Card napoh ka Jylla Assam ban kam ba kidei ki nongshong shnong ka India”.
“Kine ki briew kiba la suba ba ki dei ki nong Bangladeshi bad hadien ba la pynshisha da ki pulit na Assam la ïathuh ba kidei ki nong Assam, ki la kam ba ki wan sha Dalia kum ki nongjngohkai pyrthei hynrei watla katta ruh kim shym la lah ban ai kyrteng ïa ka trai ïing ba ki la sah hynnin ka miet. Kine ruh kim shym la lah ban ïathuh da kano ka kali ki wan sha katei ka shnong,” la ong u Bah Roy.
U Bah Roy u la pyntip ba hadien ka jingtohkit bniah, la lap ba uwei napdeng ki 4 ngut u don ar tylli ki EPIC card kiba don ïa ki kyrteng Samchul Hoque bad Samchul Bor kiba la ai ha kajuh ka tarik da u electoral registering officer jong ka Nagaon district, Assam.
“Kane ka la wanrah ïa ka jingartatien kaba jur ha ka jingmut jingpyrkhat jong ki dkhot ka HYC. Hadien ba la dep ban peit ïa ki phone jong ki, kawei na ki dur ba ki don ka dei ka pisa jong ka ri Bangladesh, hadien ba kim shym la ai ïa ka jubab kaba sngewhun ban pynthikna la kidei ne em ki nong India, ki dkhot jong ki la aiti ïa ki sha ki pulit ka Shella,” u la ïathuh bad u la bynrap da kaba ong, “Nga la ïakren bad u SP ka East Khasi Hills district bad u la pyntip ba u la phah ïa u SDPO ka Sohra sha Shella PS ban tohkit ban lap ïa ka jingshisha, la kine ki briew ki dei ne em ki nong India”.
“Ha ka jingtohkit, u SDPO u la ong ba kine ki briew ki la pyntip sha ki pulit ba ha ka jingshisha ki dei ban leit sha NEIGRIHMS ban ïoh jingsumar hynrei kim lah ban ïathuh kumno ki la poi sha Shella kumta kata ka dei kaei kaei kaba la pynmih shibun ki jingartatien ha ka jingmut jingpyrkhat jong ngi bad ka tnat pulit. Haba ïadei bad kane ka Sorkar bad ka tnat Pulit kidei ban shim khia bha ïa kane ka kam da kaba pynlong ïa ka jingtohkit kaba bniah bha,” u la ong.
Haba pynpaw ïa ka jingsngewkhia halor ka jingwan rung be-aiñ sha kane ka Jylla, u Bah Roy u la ong ba ha kine ki khyndiat taïew ba la dep ka HYC ka la ïoh jingtip ba ka la don ka jingjur bha ka jingïaid lynti jong ki briew na Bangladesh kiba wan rung sha ki jaka jong ka Ri India.
Haba ïadei bad ka jingkren jong u Myntri ka tnat kam pohïing ka Sorkar Pdeng u Amit Shah halor ka jingwan rung ruh ki nong Bangladesh sha India lyngba ka West Bengal kiba la biang lypa ki kot ki sla, u president ka HYC u la ong, “Lada kine ki briew ki lah ban ïoh ïa ka EPIC, Aadhaar lane Pan Card na West Bengal lane Assam lane na kano kano ka Jylla ki lah ban rung da kaba suk sha Meghalaya”.
“Ngim kwah ba kan jia kumta hapoh Meghalaya bad kumta ngi khot ïa ka Sorkar Jylla ba kan shim khia bha ïa ka mat jong ka jingwan buhai shnong ki nong Bangladesh. Lada ym shim ïa ki sienjam, ngi sheptieng ba kan poi ka sngi ba kine ki briew kin ïoh ïa ka jaka sah ba pura ha ka Jylla Meghalaya bad kin long ki nongthep vote bad kin ïoh ïa baroh ki hok bad ki jingmyntoi kum ba ïoh ki trai shnong,” u la bynrap.
Nalor kane u president ka HYC u Bah Roy u la pyntip ba ka CoMSO ka la thoh sha u Myntri Rangbah ka Jylla ha kaba ïadei bad ka jinglong jong ka ILP bad ka MRSSA Amendment bill, 2020 bad haduh kine ki sngi ka COMSO kam pat ïoh ïa kano kano ka jubab na u Myntri Rangbah.
Shuh shuh u nongïalam ka HYC u la ïathuh hadien ba ki pulit ka Shella ki la dep ban pynshisha na ki pulit ka Assam, la lap ba ki dei na Assam bad ki don ki kot ki sla na kane ka jylla hynrei tang kawei ka long ba kim lah ban pynshai kumno bad balei ki leit sha Dalia, Shella bad la suba ba kidei ki nongkhaïi baleh ïa ki kam khaiï tuh sha Bangladesh.
