Yn shong bishar ka sorkar ïa jingdonkam ban kyntiew kyrdan ïa ki SSS sha ki HSS : Director DSEL

Shillong, Ïaïong 21: Ka sorkar jylla shen kan sa shong bishar halor ka jingdonkam ban kyntiew kyrdan ïa ki secondary school sha ki higher secondary school, ka jingpynmih ïa ki stream ba thymmai ka jingplie ïa ki shift thymmai hadien ba la ïohpdiang ïa ki jingtyrwa na ki district school education officers (DSEOs), kiba la shah bthah ban sam ïa ki admission form sha baroh ki khynnah pule kiba la pass ha kane ka SSLC examination, ha kane ka snem.
Ïa kane la ïathuh da u Director School Education Literacy u Bah Banteilang J Kharshandi hadien ka jingïalang ba la pynïaid da u Commissioner & Secretary Vijay Kumar Mantri bad ki DSEO bad SDSEO halor ki admission class XI kaba la long ha ka sngi nyngkong.
U Bah Kharshandi u la ong ba haba ïadei bad ka jingkyntiew kyrdan ïa ki 4 tylli ki secondary school jong ka sorkar jylla sha ki higher secondary school, ïa kane yn sa leh da ka sorkar.
U la bynrap ba haba ïadei bad ka kam pynrung klas, ka tnat ka la bthah ïa baroh ki DSEO ba kin sam ïa ki admission form na ka bynta ki stream bapher bapher ha kaba baroh ki jaka pule kiba kwah ban kyntiew sha ki higher secondary.
“Ka shong ka jingjubab jong ki samla pule, ki DSEO kin sa shim khia ïa kane la ka jingtyrwa ban wanrah ïa ki stream bathymmai ha ki jaka pule ba don donkam ban leh ne em. La kumno kumno la shai ka sngi baroh ki jingtyrwa yn pyndep da ki DSEO ha shwa ba ngin rah sha ka kynhun myntri,” bynrap u Bah Kharshandi.
U Director u la pyntip ruh ba ka tnat kan sa thung ïa ki nonghikai ka ban long katkum ka jinglum jingtip ban leh da ki DSEO. U la ong ruh ba lada ki don tang kumba 8-10 ngut ki samla pule kan ym shong hok na ka bynta ka sorkar ban plie thymmai ki stream bad ban thung ïa ki nonghikai.
“Kumta ka shong ha ka jingdon ki khynnah kum ka nuksa, lada ngi ïoh la kumno kumno 30-40 ngut ki khynnah pule, kumta ïa ka jingai jingmut ban plie ïa ka stream bathymmai ha ka science ha kino kino ki skul higher secondary jong ka sorkar, kumta kane ka jingai jingmut lah ban phah sha ngi, ngin sa shim na ka bynta ka jingmynjur jong ka cabinet bad hadien ba la mynjur da ka cabinet ngin sa bthah ïa baroh ki DSEO ban ïaid shakhmat ba ki kam admission, ban ïaid shahmat ruh bad ka new academic session bad na ka bynta shi por tad haduh ki kam thungkam la lah ban leh kumta yn sa thungkam shipor ïa baroh ki nonghikai,” u la ong.
Haba kylli, u director u la ong ba katkum ka jingkheiñ kaba la don bad da kaba shim jingkheiñ ruh ïa ka jingdon ki jaka pule shimet, ka jingdon kiwei pat ki jaka pule kan long kaba biang ban pynrung klas ïa baroh ki samla pule, kynthup ïa ki CBSE bad ICSE hadien ba la pynmih ïa ki result.