Shillong, ïaïong 21 :U Rangbah shnong jong ka shnong Ladmawreng, East Khasi Hills u la ong ba ka jingbthah ka Directorate ban wan aiti ne surrender noh ïa ki card rashon kiba hap ha ka NFSA lada don kiba treikam sorkar kam long ka ba bha.
U la ai nuksa ruh da kaba ong lada ha ka ïing ki don san ngut bad lada uwei u khun u treikam sorkar hap ban aiti noh baroh kawei ka card kam long, namar lehse uta u khun/ka khun u /ka leit iing briew noh shawei mano ban thied khaw haïing hasem lada ka ïing ka dei ka ba duna ka jingïoh jingkot.
Lyngba u kyrwoh la ai jingmut ruh ba lada don ba treikam sorkar ha ka ïing dei ban weng beit tang ïa u/ka na ka card ration khnag ba lada um shong shuh haïing ruh kan ym ktah ïa ka ïing ka sem baroh kawei.
U la ong ruh kiba treikam sorkar ki don ha la ka jong ka thup, kata ki adhoc ki officiate ki contractual ki muster roll bad kumjuh ruh ki nonghikai, ki don bun rukom bad ka tulop jong ki ruh kam thikna don ka por ba ki ïoh hadien lai bnai, te lehse ka ei ka ban jia ïa ki ha ka por ba kim ïoh tulop. Kumta u la kyntu ïa ka sorkar ba kan bishar sani bha khnang ba kin ym mih kino kino ki jingeh ia ki paidbah.
“Hooid ka jingbthah na ka liang ka Directorate ban link ïa u adhar bad ka card rashon khnang ban ïoh jingkheiñ artad ïa ka jingdon briew namar u adhar u dei u Unique Identification Authority of India (UIDAI) bad lada ki bym link hapoh 30 tarik u bnai iaiong kan mih ka jingeh ïa ki nongbam khaw rashon,” u la ong da kaba bynrap, hynrei ban shu pynduh hak dak kam long ka ba bha, kata da kaba kyntu ïa ka sorkar ba ka dei ban pynlong kham bun ïa ki jingpynshai paidbah ne ha man ki shnong khnang ba ki paidbah kin sngewthuh kham bha halor u adhaar.
U la ong ruh ba ka Supreme Court ruh ka la ong ba ym dei ban pynbor ban shon adhaar, hynrei ka sorkar ka kyntu ba kin shon adhaar khnang ba ka jingïarap na ka sorkar pdeng ruh kan wan ka jingmyntoi sha ki ba shon adhaar.U la ong ba ka sorkar jylla kan shim ka sienjam ba kumno ki bym pat mon ïa u adhaar kin sngewthuh ïa ka jingdonkam lyngba ki jingpynshai paidbah hynrei ym ban shu pynduh noh hadien ka 30 tarik une u bnai ïaïong.
Nalor kata u la ong ruh bun ki longïing kim don ïa ka card rashon wat la ki la biang ïa u Adhaar ruh, bad kumta la dei ban pynkloi noh ïa ka khanasamari ne census khnang ba ki bym don kin ïoh noh ïa ki card rashon.
Shuh shuh u la ong ba ïa ka census la ju leh man la ka shiphew snem hynrei mynta la palat ïa ka shiphew snem ym pat shym la leh ïa ka census, kumta u la kyntu ruh ïa ki bym pat ïoh card rashon ba kin ïai shah tad hadien ba la dep thoh census.
