Shah jied u Khambor Batei Kharjana kum u nongïashim bynta ha ka phainal ka WAVES 2025 Animation Challenge

Shillong, Ïaïong 21: La pynbna ïa ki nongïashim bynta ba la poi sha ka phainal jong ka Animation Film Makers Competition (AFC) kaba long kum shi bynta jong ka ‘Create in India Challenge Season-1’ jong ka WAVES 2025.
La pynbna ïa u Bah Khambor Batei Kharjana na Meghalaya kum uwei na ki 42 ngut kiba la poi sha ka phainal ha ka Animation Film Makers Competition (AFC) jong ka WAVES 2025, na ka bynta ka projek jong u kaba la tip kum ka Lapalang: A Khasi Folklore Reimagined, shi bynta jong ka ‘Create in India Challenge Season-1’.
Haba ïasam ïa ka jingsngewkmen jong u, u Bah Kharjana u la ong, “Nga ainguh ïa U Jisu Khrist na ka bynta ka WAVES, ka la long ka jingjia kaba sngewtynnad bha! Ki jinghikai na ki riewshemphang jong ka ri bad nabar ri ki long shisha kiba kordor. Kane ka long kum ka sienjam kaba khraw shakhmat na ka bynta ka kam shna animation ha India. Ka jingkhang ka la plie lypa – mynta ka shong ha ngi ban shim ïa ka sienjam bad peit shano ka ïalam!”
Ki 42 tylli ki projek kiba bha tam, kiba pynleit jingmut ha ka jingïathuh khana tynrai ha kylleng ki bynta jong ka kam animation, kaba kynthup ïa ka jingpynwandur tynrai, ka VFX, Augmented Reality (AR)/Virtual Reality (VR), bad virtual production, ki la poi sha ka wat ïakhun ba khatduh. Kine ki nongïashim bynta kiba don sap mynta kin ïoh ïa ka lad ban pyni ïa ki projek jong ki ha ka WAVE Summit ka ban long ha Mumbai naduh ka 1-4 tarik Jymmang, 2025. Ki 3 ngut kiba jop kin ïoh ki khusnam pisa kaba mar 5 lak tyngka.
Ka jingjied ïa ki 42 ngut ki nongïashim bynta kiba la poi sha ka phainal ka dei na ka jingbishar bniah kaba la neh haduh khyndai bnai ba la ïalam da ka kynhun Dancing Atoms, ha ka jingïatreilang bad ka kynhun jong ka WAVES. Ïa ki jingpyrshang ba aiti lut jong ki nongïashim bynta la ïoh jingïarap na ka jingstad jong ka kynhun ba donburom jong ki dkhot nongbishar napoh ka ri bad na kiwei kiwei ki ri, kynthup: Anu Singh Farrukh Dhondy, Dan Sarto, James Knight, Jan Nagel, Gianmarco Serra, Indu Ramchandani, Vaibhav Piwlatkar.
Ka thup jong ki 42 ngut kiba la poi sha ka phainal bad ki projek jong ki don ha ka Annexure.
Ka jingktah ïa ka ïoh ka kot na ki projek jong ki ka long kaba kongsan, ha kaba kawei pa kawei ka phlim VFX animation ka lah ban pynmih ki lad ïoh kam na ka bynta 100-300 ngut ki briew. Ka WAVES AFC 2025 ka pyni ïa ka jingbei tyngka kaba kongsan ha ki sap saiñdur jong ka ri India, kaba kyntiew ïa ka lad ïoh kam bad ki lad ki lynti ba don kylleng ka pyrthei. Ka jingthmu jong ka jingïakob ka long ruh ban kyntiew ïa ki jingïatreilang hapdeng ki ri bapher bapher ban pynmih ïa ki prokram.
Kane ka sienjam ha kylleng ka pyrthei, kaba la kyrshan da ka tnad Information & Broadcasting bad kaba lamkhmat da ka Dancing Atoms, ka dei ka sien kaba nyngkong ba baroh saw tylli ki bynta jong ka kam AVGC ba la mihkhmat hapoh kawei ka rynsan ha kum kane ka jingïakop.
Ka WAVES AFC 2025 ka la ïoh ïa ka jingïashim bynta kaba khraw, da kaba ïoh kumba 1900 tylli ki jingpynrung kyrteng bad 419 tylli ki jingkyntiew kyrteng bapher bapher na ki briew ba sngewtynnad ïa kane ka kam, ki samla pule kiba don sap, bad ki riewshemphang kiba la tbit ha kylleng ka pyrthei. Kane ka jingïashim bynta shitrhem ka pynpaw ïa ka bynta ba kongsan jong ka jingïakop ha kaba ithuh bad kyntiew ïa ki sur ba thymmai hapoh ka kam shna animation.