Hap long husiar haba dei bad ki khubor POCSO, kyntu ka MSCPCR, Advocate bad Pulit

Shillong, Jymmang 10 : Ki riewshemphang ba ïadei bad ki aiñ POCSO kynthup naduh ka Chairperson jong ka Meghalaya State Commission for Protection of Child Rights (MSCPCR) ka Agatha K Sangma, ka Advocate Kong NG Shullai bad kumjuh u Deputy Superintendent of Police (Crime) Bipul Das ki la ong ba ki jingjia kiba ïadei bad ka aiñ POCSO ki dei kiba eh bha bad kumta ka donkam ïa baroh kynthup ïa ki lad pathai khubor ba ki dei ban long kiba husiar bad bishar bniah haba ïadei bad kane ka mat.
Ïa kane, kine ki riewshemphang ki la pynpaw ha ka rynsan ïatai ba la pynlong da ka Shillong Press Club ha ryngkat ka jingïatrei lang bad Directorate of Information & Public Relations kum shibynta ka jingrakhe ïa ka World Press Freedom Day.
Da kaba pynpaw ba ki lad pathai khubor ki lah ban pynmih ïa ki jingjia kiba ïadei bad ka POCSO hynrei ki la maham lypa pat ba donkam ban long kiba husiar namar kane ka lah pat ban ktah ïa ka jingim bad ka jingmut jingpyrkhat jong kito kiba ngat ha kine ki jingjia.
“Lah ban pynmih ïa ka jingjia hynrei katkum ka ain POCSO ym lah ban pynmih ïa ka kyrteng jong kito kiba ngat ha ka jingjia lane ka jaka jong ki. Lada pynkhein ïa kane ka aiñ kan buh jingeh kylla pat ïa ki lad pathai khubor bad lah ban shah ujor kylla ruh,” ki la ong.
Na ka liang ka Chairperson jong ka MSCPCR ka la ong ba ka kamram jong ki lad pathai khubor ka long ban pynshai ïa ki paidbah bad kumjuh ïa ka imlang sahlang shaphang ki ain bad ki kyndon jong ka POCSO. “Ka jingthombor ïa ki heprit ka jia kylleng dei na kane ka daw ba ka mih ka POCSO kaban long kum ka atiar kaba don ïa ki kyndon jingpynshitom kiba eh bha kynthup wat ka jingpynshitom da ka jingïap ruh,” ka la ong.
Na ka liang ka Advocate pat ka la ong ba kino kino ki paidbah kiba don ka jingtip ba ka don ka jingshah thombor ïa ka longrynieng jong ki khynnah ki dei ban pyntip mardor sha ki bor ba dei peit.
Shwa kane, na ka liang u DSP Crime u la ïathuh ba ka jingdon ki jingjia POCSO ka kiew bha ha East Khasi Hills khamtam eh ha une u bnai Iaiong. Kumta u la ong ba ka long kaba donkam ïa ki lad pathai khubor ban shim lang ïa ka jingkitkhlieh ban pynshai bha ïa ki paidbah.
Nangta u ong ruh ba ki jingjia ba dei bad ka POCSO ki dei kiba eh bad khia bha kiba donkam ban pyntikna ba kito kiba ngat ha ka jingjia kin ym shah ktah shuh shuh tang na ka daw ka rukom thoh khubor.
Ha kajuh ka por ki la kyntu jur ba ka jingpynmih khubor kam dei satia ban ktah ïa kito ki lanot hynrei ba kan long ka jingpynshai bad ka jinghikai ïa ki paidbah khnang ba yn lah ban ïakhun pyrshah ïa ka jingthombor ïa ka longrynieng jong ki khunlung khynnah.