Pynjari kyndon 163 BNSS 2023 namar ka elekshon MDC

Shillong, K’ Lyngkot 27: Ka Deputy Commissioner ka East Khasi Hills, ka la pynjari ïa ka kyndon 163 BNSS kiba khang pyrshah ïa kino kino ki kynhun ba kin pynlong ïa kino kino ki jingïakhih hapoh ka District namar ka jingdon jong ka elekshon MDC ha ka jylla.
Katkum ka hukum, ka District Magistrate ka la ïathuh ba ka la ïoh khubor ba ki don ki seng kiba don jingthmu ban pynlong ïa ki jingïakhih kum ka jingshah jingit, ïaid paidbah, rally bad kiwei kiwei hapoh ka District.
Ka ong ba lada ailad ban pynlong ïa kine ki jingïakhih, ka lah ban pynmih ïa ki jingkulmar bad pynthut ïa ka shongsuk shongsaiñ bad pynthut ruh ïa ka jingïaid beit ïaid ryntih jong ka elekshon KHADC, ka ban long ha ka 21 tarik Rymphang.
Lah ban pynkynmaw ba u Lat ka Jylla, u la pynmih ïa ka jingpynbna ban pynlong ïa ka elekshon KHADC bad JHADC ha ka 21 tarik u Rymphang.
Ka Sorkar Jylla ka la sdang pyntreikam ruh ïa ka Model Code of Conduct bad kiwei kiwei ki jingbthah jong ka Tnad District Council Affairs (DCA) hapoh ka Jylla baroh kawei.
Ka District Magistrate ka laïathuh ba ka hukum ba pynjari ïa ka kyndon 163 BNSS kan treikam noh mardor tad haduh da pynmih da kawei pat ka hukum.