Pynïasoh Congress u Bah Denis Mukhim ban ai jingkyrshan ïa u Bah Charles Marngar ha Mawhati

Nongpoh, Kyllalyngkot 23: U Bah Denis Mukhim uwei naki riew rangbah u ba la thmu ban aireng ha kane ka elekshon ban wan sha ka ïing Dorbar Thawaiñ ka jylla, u la shim syndon ïaka rai ban leit ai ka jingkyrshan noh ïa u Bah Charles Marngar u ba dei u kyrtong jong ka Congress bad MDC ka Mawhati Constituency ha kane ka elekshon ba mynta, hadien ba u iohi ba utei u rangbah u don ka jingkyrmen ban jop na Mawhati.
Ïa u Bah Denis Mukhim ba ju khot ïeid u Bah Mode ryngkat bad ki hajar ngut ki nongkyrshan jong u hapoh ka lama ka MCPF, la pdiang burom mynta ka sngi da u Bah Vincent H Pala President ka MPCC, haka jingdonlang u Bah Charles Marngar bad kiwei kiwei ki heh nongïalam jong ka party Congress naka jylla bad kumjuh na Ri-Bhoi District haka jingïalang kaba la long haka shnong Umsohlait.
Haba kren ha katei ka sngi u Bah Denis Mukhim u la pynpaw ba ka daw kaba la pynlong ïa u ban leit kyrshan ïa u Bah Charles Marngar ka dei namar ka jingsageh noh jong u ban ïakhun ïa kane ka elekshon hadien ba ka party UDP kala pynduh tiket ïa u, hynrei u la ong ba katei ka jingpynduh tiket ka party UDP ka nang pynrhem ïaka mynsiem jong u ban shakri ha kaba u la iohi ba u Bah Charles Marngar u ba dei ruh u MDC u dei u briew ba biang tam ïalam ïaka Mawhati kum u nongkhmat sha ka iing dorbar thawaiñ ka jylla hadien ka elekshon bad ei halor katei ka nongrim ryngkat bad ki nongkyrshan jong u kila shim ïaka rai ban leit kyrshan noh ïa u Bah Charles Marngar ban pynjop donburom ïa u ha kane ka elekshon ban wan.
“Nga la iohi ïaka jingsngewrit ka jinglen lade bad ka jingtrei shitom jong u Bah Charles Marngar kum u MDC barit ban trei bad shakri ïaka Mawhati Constituency khamtam haba ki paidbah ki mad jingeh haki khappud, ka jingwan lyngshop jong ka khlam Covid-19 u ba don syndah bad ki paidbah, u ba dei ruh u briew jong ka Mawhati Constituency dei namarkata ka daw kum uwei naki riew rangbah ryngkat bad ki nongkyrshan kila rai ban kyrshan ban pynjop ïa u Bah Charles, watla ka UDP kala pynrem bad pynduh tiket ïanga” la ong u Bah Denis.
Kum uwei naki nongrep bad uwei naki riew rangbah u ba ju don ryngkat bad ki nongrep u Bah Denis u la kren shai ruh ha katei ka sngi kumba ka Mawhati kiba bun naki paidbah ki dei kiba im haka rep ka riang, u kwah ba u Bah Charles Marngar un buh nyngkong ïaka thong ban peit ïaka jingeh jong ki nongrep bad ka jingbit jingbiang jong ki.
Naka liang u Bah Vincent H Pala haba kren ha katei ka sngi u la pynpaw ka jingsngewkmen ban pdiang burom ïa u Bah Denis Mukhim ryngkat ki nongkyrshan jong u bad kane ka pyni bad pynshngaiñ ïaka seng Congress ba kan dang kiew ha ka jylla watla kiwei ki beiñ bad ong ba ka seng Congress kala ngam haka jylla.
Kum u nongïalam ka Party u la ong ruh ba kane kadei ka jingkyrmen ïaka seng Congress ban rah ïa u thong ka jingjop namar ha Mawhati donkam ïa u briew u ba trei ïaka kam ym u ba heh tyngam, bad lyngba ka jingkyrshan jong ki paidbah u Bah Charles un long u nongjop ban shakri bad wanrah shibun ki jingkylla ban lur ïaki lyngkha ba sah shrah jong ka Mawhati.