Shillong, K’lyngkot :Ka tnat shipai Directorate General of Assam Rifles hynne ka sngi Nyngkong ka la ïoh ban plie ïa ki tiar ïalehkai kilan met (Open Air Gym) ha madan ïewpyrsing Nongkrem.
Kine ki tiar ki dei kiba la ai sngewbha da ka ophis jong ka DGAR sha ki nongshong shnong jong ka shnong Nongkrem na ka bynta ban wanrah ïa ka jingkoit jingkhiah bad ka jingshait jingkhlaiñ hapdeng ki nongshong shnong.
ïa kine ki tiar la ai sngewbha lyngba ka skhim Civic Action Plan 2022- 2023. Nalor kata ïa kine ki tiar kilan met la wan ban plie da U Commandant ka Assam Rifles u Shri. Vijay Kumar kum u Kongsan ha ryngkat ka jingïadon ryngkat U OC ka Assam Rifles u Shri. Rakesh Kumar kumjuh ruh u Bah Bhalang Lyngdoh, Chairman ka Nongkrem Dorbar Pyllun, ki nongshong shnong ka shnong Nongkrem bad kumjuh ruh ki khynnah skul jong ka Nongkrem Higher Secondary School.
Haba aijingkren u Kongsan u la ong ba ka shnong Nongkrem ka long kawei ka shnong kaba donbok eh namar ki bun ki jingïarap kiba kum ka ophis ka ju ai bad kim ju kyntait na ka bynta ka jingmyntoi jong ka shnong ka thaw hi baroh kawei. ïa kane ka prokram la pynïaid da u Bah. Empower Warbah, General Secretary ka NYDA.
