Shillong, K’lyngkot : Ka ‘Phudmuri Winter Games 2023’ ka la kut hapdeng ka jingiphuh iphieng bad i shongkun hadien ba la pynhap pyrda noh ha Children Park jong ka Forest, Phudmuri ha ka 20 tarik u Kyllalyngkot, 2023.
Ha kane ka Winter Games kaba la pynïaid da ka Seng Samla Mawlai Phudmuri ki don ki jingïakob ïalehkai bapher bapher kum ka Football, ka basketball, ka mawpoiñ, ka kriket, ka Quiz, ka ïakob shad, rwai, ka fancy dress bad kiwei kiwei.
Ha kine ki jingïakob bapher ba la shim bynta shit rhem da ki nongshong shnong ka dong Madan-Heh East B ka la wan nyngkong, katba ka dong Kjatshnong ka la wan baar bad ka Massar ka la wan balai.
La pynkut ïa ka prokram da ka jingïakob pyni riam ka fancy dress ba la shim bynta da ki khynnah jong ki phra tylli ki dong kiba don ha Mawlai Phudmuri.
Ha kane ka sngi kut la wan sakhi lang ka seng longkmie Mawlai Phudmuri, u rangbah shnong bah S. Khongkliam, ki nongkitkam shnong, ki nongkitkam ka seng samla Mawlai Phudmuri, ki paidbah nongshong shnong bad kiwei kiwei.
Na kal iang u president ka Seng Samla Mawlai Phudmuri u bah Hambert Rani u la ai khublei ïa baroh kiba shim bynta, ïa ki nongkitkam bad baroh kiba don bynta ha ka jingpynlong ïa ka Winter Games 2023 kaba jop bad kaba ïaid beit iaid ryntih. Ha kane ka sngi la ïoh ruh ïa ka jingkren na u rangbah shnong bad na u bah S.Khonglam.
