Shillong, K’lyngkot 23: U National President jong ka NPP, u Conrad Sangma, u la maham ïa ka nongïalam ba heh duh jong ka Trinamool Congress, ka Mamata Banerjee ba kiba bun ki MLA jong ka TMC kin iehnih noh ïa ka Seng tang shu dep ka elekshon.
Haba kren ha ka jingïalang paidbah jong ka Party ha Adokgre, u Conrad u la ai burom ïa ka Mamata Banerjee, kaba la kyrshan ïa u Kpa jong u ha ka por ba u ïakhun ïa ka shuki President jong ka ri India.
Hynrei ha kajuh ka por, kum ka dak ka jingburom ïa ka, u Conrad u la maham ruh da kaba ong ba kadei ban husiar bad peitngor bha, namar kin don bun ki MLA jong ka TMC ki ban iehnoh ïa ka Party tang shu dep ka elekshon. “Ym dei ma nga ba ong ïa kane, hynrei ki khubor, ki jingïakren, ki briew ki ïathuh ïa kane”, la ong u Conrad.
Shuh shuh u la ong ba ki don napdeng ki MLA jong ka TMC kiba la dep ïakren bad ai ktien lypa bad kiwei ki Party ba kin pynïasoh bad ki tang shu dep ka elekshon 2023.
Ha kajuh ka por, u Nongïalam jong ka NPP, u la ther ruh ïa ka TMC kaba ong ba ka BJP kadei ka Seng ba na shabar kumba ka la ong ha West Bengal. U la ong ba ka TMC kadei ban kynmaw ruh ba ha Meghalaya ka dang dei ka Seng kaba thymmai kaba la shu pynlong da ki nongïalam jong ka Congress. “Kiba bun napdeng jong ki, ki la tymmen bad ki la ïoh lad ban shakri lyngba ka Congress, tangba kim shym la lah ban pynhun ïa ka jingangnud jong u paidbah”, u la ong.
U Conrad u la ong ba ka n dang shim porïa ka TMC ba kan suh thied ha Meghalaya bad ka thaiñ shatei lammingi, namar ba kim pat sngewthuh ïa ka jinglong ki briew kane ka thaiñ.
