Pynbna u DEO ka Ri Bhoi ba la pyntreikam pura ïa ka MCMC, peitngor ka bor District ban ïaid beit ka election

0

Nongpoh, Kyllalyngkot 23: Ban ïaid beit ïaid ryntih naduh ka jingpynkhreh ïa ka election bad ruh ban pynshlur ïa ki nongthep vote ba kin tip ïa la ka hok thep vote ban jied ïa kita ki nongmihkhmat, u District Election Officer ka Ri Bhoi, u Aprit Upadhayay u la pynbna paidbah ba ïa ka Model Code of Conduct la pyntreikam ha baroh ki bynta jong ka Ri Bhoi District, kaba dei hadien ba ka election commission ka Ri India ha ka 18 tarik ka la dep ban pynbna ïa ka tarik ban thp vote ka ban long ha ka 27 tarik u Rymphang 2023 hapoh ka jylla.
Haba ïa kren bad ki Nongthoh Khubor mynta ka janmiet ha ka ophis treikam jong u ha Nongpoh, u District Election Officer ka Ri Bhoi bad uba dei ruh u Deputy Commissioner ka Ri Bhoi, u Arpit Upadhayay u la ïathuh naduh ba ka election commission ka Ri India ka la pynbna ïa ka tarik ban thep vote bad ka Model Code Of Conduct ruh ka la treikam ha kaba ngi hap ban bud katkum ki kyndon khnang ba kan log ka election kaba ïaid beit ïaid ryntih ba ki nongthep vote kin ioh ïa la ka hok ban jied ïa kita ki nongmihkhmat.
“Haba la pyntreikam ïa ka Model Code of Conduct, baroh ki sector officers, ki magistrate bad ki Returning officers la dep bthah ïa ki ba kin long kita kiba peitngor ban nym don kino kino kiba pynkhein ïa ka Model Code of Conduct bad kine kin treikam ban pynthikna ba kan nym dei ban don kano kano ka jingshah pynthud ïa ki paid nongthep vote” ong u Arpit Upadhayay.
Na ka bynta kito kiba la noh ka rta bad kito kiba don ka jingduna ha ka dkhot met, la shim ïa ki kum kita ki nongthep vote ba kyrpang bad na ka bynta kine la dep ban pynbeit ba ki lah ban leit thep vote sha ki Polling Station lane ki lah ruh ban thep vote lyngba ka Ballot Vote ha kaba la deo ban ai jinghikai ïa ki BLO ba kin leit sha ki shnong ban pynsngewthuh na ka bynta kito kiba duna dkhot met (Differently abled) bad ruh kito kiba la noh ka rta (Senior Citizen).
U la pyntip ruh ban nym don kano kano ka jingthud lane kaba ktah na ka bynta kane ka election ki Pulit ka Ri Bhoi ruh ki la long kiba peitngor bad dang shen ruh ki la dep ban kurup ïa u drok Heroin ba shongdor T. 1 klur bad kumjuh ruh la ioh ban kurup ïa ka ksiar kaba don ka jingkhia 570 gram ba la shongdor kumba T. 30 lakh bad la leh ïa kane ka long shi bynta ban wan rah ïa ka jingthep vote kaba ïaid beit ïaid ryntih, u la ong.
Shuh shuh, u la ïathuh ruh ba mynta ka sngi ka bor synshar District ka la pynlong ïa ka jingïakynduh lang jong baroh ki nongmihkhmat na ki political party ban pynshai halor ka jingpyntreikam ïa ka Model Code of Conduct bad ruh ba kin bud ryntih katkum ki kyndon jong ka model code of Conduct ha kaba lada ki pynlong ïa ki jingïalang paidbah ne kita ki rally ruh ki hap ban ioh bor na ka ophis u District Election Officer khnang ba kan nym don kano kano ka jingktah na ka bynta ka jingpynkhreh ïa kane ka election bad ruh ba ki paidbah kin dup shlur ban jied ïa kita ki nongmihkhmat katkum ka hok ba la pynkhamti da ka riti synshar jong ka ri, u la bynrap.

Leave A Reply

Your email address will not be published.