Jowai, K’Lyngkot 23: Ka jingïalehkai phutbol bala tip kum ka ‘1st Knock Out 10-Aside Football Tournament 2022-23’ ba la pynïaid da ka Youth and Cultural Sport Club Sohmynting kala poi noh sha kaba kut ha kaba ka kynhun Unite Together FC (Sohmynting) kala long ka lahduh da kaba jop ïaka Amlanai Young Boy (Amlanai) ha ka jingïashut Tie Breaker. Haba phia sha ka jingïakhun hapdeng kine ki ar kynhun kala long shisha kaba itynnad bad kaba ïakhiad bha namar naduh ka kylla step ym shem la don kiba thep kol satia 0-0. Katba ha ka kylla miet ka Unite Together FC kala ïalehkai bha bad kala ïoh ban thep ïa ka kol ba nyngkong lyngba u Figo Syndai uba phong ïa ka jersey No-9 haka minute kaba 57, ka jingïakhun kala nang itynnad shuh shuh bad na ka liang ka Amlanai Young Boy kala lah ban pynphai kylla ïa katei ka shi kol kaba la kum thep bakla (Own Goal) ha ka minit ba 61 bad kane jingïakhun kala neh da 1-1 kol. Hadien kane na ka liang ki bor pynïaid kila hap ban pynïakhun noh da ka jingïashut Tie Breaker, ha kaba ka Unite Together FC kala jop da 3-1 kol bad kala long ruh ka kynhun kaba jop nyngkong ïa kane ka lympung. Katba ïa ka nam Man of the Match la ïoh da u Figo Syndai ka Unite Together FC.
